Nanded Crime: नांदेडमध्ये गोळीबार करणाऱ्या दोन आरोपींना एटीएस पथकाकडून पंजाबमध्ये अटक

नांदेड: नांदेड: नांदेड शहरातील शहिदपुरा परिसरात १० फेब्रुवारी रोजी झालेल्या गोळीबार प्रकरणातील मुख्य आरोपी व त्याच्या साथीदाराला महाराष्ट्र एटीएसच्या पथकाने पंजाब राज्यातून मुसक्या आवळल्या आहे . आरोपी जगदीश ऊर्फ जग्गा आणि शुभसिंघ ऊर्फ शुभ यांना पकडण्यात आले असून, त्यांच्याविरोधात वजीराबाद पोलीस ठाण्यात गुन्हा दाखल करण्यात आला आहे.

१० फेब्रुवारी रोजी सकाळी साडेनऊच्या सुमारास शहिदपुरा भागात रवींद्रसिंघ राठोड व गुरमीतसिंघ सेवालाल उभे असताना त्यांच्यावर गोळीबार करण्यात आला होता. या हल्ल्यात रवींद्रसिंघ राठोड यांचा जागीच मृत्यू झाला, तर गुरमीतसिंघ सेवालाल हा गंभीर जखमी झाला. विशेष म्हणजे गुरमीतसिंघ २२ जानेवारीपासून पॅरोल रजेवर तुरुंगातून बाहेर आला होता.

या प्रकरणाची गंभीर दखल घेत पोलिसांनी तातडीने तपासाला सुरुवात केली. विशेष दंगा नियंत्रण पथक स्थापन करून संशयित आरोपींच्या हालचालींवर लक्ष ठेऊन होते. तपासादरम्यान गोळीबार करणाऱ्या आरोपींना मदत करणाऱ्या पाच जणांना पोलिसांनी ताब्यात घेतले. गोपनीय माहितीच्या आधारे महाराष्ट्र एटीएसच्या पथकाने पंजाबमध्ये धडक कारवाई करत मुख्य आरोपींना अटक केली.

अटक करण्यात आलेल्या जगदीशसिंघ याने गोळीबार केल्याची कबुली दिल्याचे समोर आले आहे. सध्या आरोपींना पंजाब न्यायालयाच्या परवानगीने लवकरच नांदेडमध्ये आणले जाणार असल्याची माहिती पोलिसांनी दिली आहे. या गुन्ह्याचा तपास जलदगतीने करण्यासाठी नांदेडसह अकोला, छत्रपती संभाजीनगर आणि नागपूर येथील एटीएस अधिकाऱ्यांचा देखील सहभाग होता.

नांदेड पोलिसांनी केलेल्या या धडक कारवाई मुळे शहरातील नागरिकांनी त्यांच्या पोलिसांच्या प्रती कौतुकउद्गार काढले आहे.