ईडीच्या चौकशीस चकवा दिल्यास देशमुखांच्या अडचणी वाढणार

मुंबई : खंडणीचे आरोप आणि आर्थिक गैरव्यवहाराच्या आरोपामुळे गृहमंत्री पदावरून पायउतार झालेले राज्याचे माजी गृहमंत्री अनिल देशमुख यांच्या सुप्रीम न्यायालयाकडून दिलासा मिळण्याच्या अपेक्षा फोल ठरल्यामुळे देशमुखांच्या अडचणी मोठ्या प्रमाणात वाढू शकतात.

हे देखील पहा -

अनिल देशमुख यांनी ईडीकडून चाललेल्या कारवाई आणि चौकशी विरोधात सुप्रीम कोर्टात धाव घेत याचिका दाखल केली होती. या याचिकेवर ३ ऑगस्ट रोजी सुनावणी झाली. देशमुखांना सुप्रीम कोर्टाकडून दिलासा मिळण्याची अपेक्षा होती. मात्र, अनपेक्षितपणे सुप्रीम कोर्टाने त्यांची याचिका फेटाळून लावली आहे. त्यामुळे आता ईडीला सामोरे जाण्याखेरीज देशमुख यांच्याकडे पर्याय उरला नाही.

तब्बल चार वेळा अनिल देशमुख यांना ईडीने समन्स बजावले होते. मात्र, चारही वेळा समन्स बजावून देखील देशमुख यांनी कोर्टातील याचिकेचा हवाला देत चौकशीला उपस्थित राहणे टाळले. त्यामुळे आता पाचव्यांदा समन्स बजावून देखील जर देशमुख ईडीच्या चौकशीस सामोरे गेले नाहीत तर ईडीकडून देशमुखांभोवती फास आवळला जाऊ शकतो.

Edited By : Krushnarav Sathe