Amul Milk : महागाईचा आणखी एक झटका! अमूल दूध उद्यापासून महागणार; प्रतिलिटर ६ रुपयांची वाढ

संजय गडदे, मुंबई प्रतिनिधी

Amul milk price hike from November 12 : सर्वसामान्यांच्या खिशाला महागाईचा आणखी एक झटका बसणार आहे. देशातील आघाडीच्या दूध उत्पादक कंपन्यांपैकी एक असलेल्या 'अमूल'ने दुधाच्या दरात वाढ करण्याचा निर्णय घेतला आहे. गुरुवार, १२ नोव्हेंबर २०२६ पासून अमूलच्या विविध प्रकारच्या पॅकबंद दुधाच्या किमती प्रतिलिटर २ ते ६ रुपयांनी वाढणार आहेत. त्यामुळे आधीच महागाईचा सामना करणाऱ्या सर्वसामान्य ग्राहकांना आता अधिक पैसे मोजावे लागणार आहेत.

गुजरात को-ऑपरेटिव्ह मिल्क मार्केटिंग फेडरेशनने दुधाच्या विविध प्रकारांच्या किमतीत वाढ केली आहे. या दरवाढीनुसार, अमूल ताजा (टोन्ड मिल्क) दुधाच्या दरात प्रतिलिटर २ रुपयांची वाढ करण्यात आली असून, त्याचा दर ६० रुपयांवरून ६२ रुपये प्रतिलिटर झाला आहे. अमूल गोल्ड (फुल क्रीम मिल्क) दुधाच्या दरात ४ रुपयांची वाढ झाली असून, त्याचा दर ७२ रुपयांवरून ७६ रुपये प्रतिलिटर झाला आहे. तर फुल क्रीम म्हशीच्या दुधाच्या दरात तब्बल ६ रुपयांची वाढ करण्यात आली असून, त्याचा दर ८० रुपयांवरून ८६ रुपये प्रतिलिटर झाला आहे.

दुधाच्या दरवाढीमागे उत्पादन खर्चात झालेली वाढ हे प्रमुख कारण असल्याचे सांगितले जात आहे. पशुखाद्य आणि चाऱ्याच्या किमतीत मोठी वाढ झाली आहे. याशिवाय दूध उत्पादनासाठी लागणारा खर्च, दुधातील फॅटचे दर, वाहतूक आणि पॅकेजिंग साहित्याच्या वाढत्या किमतींचाही परिणाम दूध व्यवसायावर होत आहे. कमी पावसामुळे काही भागांत दूध उत्पादनावर परिणाम झाल्याचेही वृत्त आहे. त्यामुळे दूध उत्पादक शेतकऱ्यांना द्यावा लागणारा खरेदी दर आणि इतर खर्चाचा ताळमेळ राखण्यासाठी ही दरवाढ करण्यात आल्याचे स्पष्ट करण्यात आले आहे.

दरम्यान, अमूलपाठोपाठ मदर डेअरीनेही दुधाच्या किमती वाढवण्याचा निर्णय घेतला आहे. त्यामुळे देशभरातील ग्राहकांना महागाईचा दुहेरी फटका बसण्याची शक्यता आहे. यापूर्वी २ नोव्हेंबर रोजी अमूलने तूप आणि बटरच्या किमतीतही वाढ केली होती. आता दुधाचे दर वाढल्याने घरगुती मासिक बजेटवर अतिरिक्त भार पडणार आहे.

दूध हे प्रत्येक घरातील दैनंदिन गरजेचे उत्पादन असल्याने, या दरवाढीचा परिणाम सर्वसामान्य कुटुंबांपासून ते हॉटेल व्यावसायिक, चहा विक्रेते आणि मिठाई उत्पादकांपर्यंत जाणवणार आहे. विशेषतः लहान मुलांसाठी आणि ज्येष्ठ नागरिकांसाठी नियमित दूध खरेदी करणाऱ्या कुटुंबांना या दरवाढीचा आर्थिक फटका बसणार आहे.

दरम्यान, शहर आणि राज्यांनुसार दुधाच्या किरकोळ विक्री दरात काही प्रमाणात फरक असू शकतो. १२ नोव्हेंबरपासून नवीन दर लागू झाल्यामुळे ग्राहकांना आता दूध खरेदीसाठी अधिक पैसे मोजावे लागत आहेत.