Accident News : समृद्धी महामार्गावर भीषण अपघात! देवीची मूर्ती नेताना पिकअपला ट्रकची धडक; ७ जणांचा जागीच मृत्यू

नवरात्रोत्सवाच्या पार्श्वभूमीवर देवीच्या मूर्तीच्या आगमनाची तयारी सुरू असतानाच अमरावती जिल्ह्यातून एक धक्कादायक घटना समोर आली आहे. शेगाव येथून दुर्गादेवीची मूर्ती घेऊन वर्ध्याकडे निघालेल्या पिकअप वाहनाला समृद्धी महामार्गावर भीषण अपघात झाला. धामणगाव रेल्वे परिसरातील चॅनल क्रमांक ९७ जवळ मागून आलेल्या ट्रकने पिकअपला जोरदार धडक दिल्याची प्राथमिक माहिती आहे. या अपघातात घटनास्थळी ५ जणांचा मृत्यू झाला, तर उपचारादरम्यान आणखी २ जणांचा मृत्यू झाला. त्यामुळे अपघातातील मृतांचा आकडा ७ वर पोहोचला आहे. तर तब्बल २५ जण जखमी झाल्याची माहिती मिळत आहे.

अपघातानंतर जखमींना तातडीने धामणगाव ग्रामीण रुग्णालयासह सावंगी येथील रुग्णालयात उपचारासाठी दाखल करण्यात आले. सावंगी येथे १९ जखमींवर उपचार सुरू असून, त्यापैकी तिघांची प्रकृती चिंताजनक असल्याची माहिती आहे. तर धामणगाव येथे सहा जणांवर उपचार सुरू आहेत.

घटनेची माहिती मिळताच पोलीस अधिकारी आणि प्रशासनाने घटनास्थळी धाव घेतली. अमरावती जिल्ह्याचे पोलीस अधीक्षक निकेतन कदम, विशेष पोलीस महानिरीक्षक महेश पाटील तसेच धामणगावच्या नगराध्यक्ष अर्चना रोठे यांनी घटनास्थळी आणि रुग्णालयात जाऊन परिस्थितीची पाहणी केली. दरम्यान, या भीषण अपघाताचा पुढील तपास पोलीस करत असून, अपघात नेमका कशामुळे झाला, याचा शोध घेतला जात आहे.