Amravati News : दुधाच्या कॅनमध्ये चक्क गुरांच्या पानवठ्यामधले पाणी; अमरावतीमधील धक्कादायक प्रकार

अमर घटारे 

अमरावती : दूध विक्रेत्यांकडून दूधात पाणी टाकून किंवा दूध घट्ट व्हावे यासाठी पावडर टाकून भेसळ केली जात असल्याचे अनेकदा समोर आले आहे. मात्र अमरावतीमध्ये एक धक्कादायक प्रकार समोर आला आहे. दूध विक्रेता चक्क दूध वाटप करताना थांबून गुरांची पाणी पिलेल्या हौदातील पाणी दुधात टाकत असल्याचे समोर आले आहे. हा प्रकार सीसीटीव्ही कॅमेरात कैद झाला आहे.

दूध विक्रेते बाहेरून दूध घेऊन ते घरोघरी जाऊन त्याचे वाटप करत असतात. चांगले दूध मिळावे यासाठी अनेक नागरिक पिशवीतील पॅकिंगचे दूध न घेता थेट घरापर्यंत वाटप करणाऱ्या विक्रेत्यांकडून दूध घेत असतात. परंतु हे विक्रेते देखील दुधाची वाटप करताना त्यात पाणी टाकून भेसळयुक्त दूध ग्राहकापर्यंत पोहचवत असल्याचे प्रकार पुन्हा एकदा समोर आला आहे. अशा प्रकारामुळे लहान बालकांसोबत मोठ्यांचे देखील आरोग्य धोक्यात येण्याची शक्यता नाकारता येत नाही. 

एक नव्हे तर दोघांनी टाकले पाणी 

अमरावतीच्या (Amravati) एमआयडीसी परिसरातील हा धक्कादायक प्रकार असून एका मार्बल दुकानाच्या बाहेर पाण्याने भरलेल्या हौदात गुरांनी या हौदातून पाणी पिले. याच हौदातील पाणी दूध विक्रेते दुधात मिक्स करून त्याचे वितरण करत आहेत. अर्थात जे पाणी गुरे पितात तेच पाणी दुधात मिक्स करून अमरावतीकर नागरिकांना वाटप केले जात आहे. हा प्रकार एकाने नाही तर दोन जणांनी हौदातील पाणी दुधात मिक्स केल्याचे सीसीटीव्हीत दिसत आहे. याकडे अन्न व औषध प्रशासन विभाग लक्ष देणार का? असा प्रश्न देखील उपस्थित होत आहे.