'गणरायाला घरी पाठवू नका' चिमुकली हुंदका देत रडली; श्रीजाच्या निरागस श्रद्धेने सर्वांचे मन जिंकले

दहा दिवस गणरायाची मनोभावे पुजा, आरती आणि सेवा केल्यानंतर अखेर गणरायाला निरोप द्यावा लागतो. शनिवारी राज्यातील विविध भागांमध्ये विसर्जन सोहळा पार पडला. भक्तांनी जड अंतःकरणाने गणरायाला निरोप दिला. मात्र, लाडक्या गणपती बाप्पाला निरोप देताना चिमुकल्या धाय मोकलून रडल्या. लहानग्यांचे १० दिवस अगदीच आनंदात जातात. मात्र, गणेश विसर्जनाच्या दिवशी लहानग्यांना अश्रू अनावर होतात. अमरावतीतील चिमुकलीलाही गणरायाला निरोप देताना अश्रू अनावर झाले.

गणपती बाप्पाला निरोप देताना अमरावतीतील चिमुकली धाय मोकलून रडली. श्रीजा थोरात असं चिमुकलीचं नाव आहे. ती अमरावतीच्या विद्यापीठ परिसरातील दत्तविहार कॉलनीतील रहिवासी असल्याची माहिती आहे. सध्या श्रीजाचा भावनिक व्हिडिओ व्हायरल होत आहे.

व्हिडिओमध्ये घरातील सदस्य गणपती बाप्पाची आरती करून विसर्जनाची तयारी करत आहेत. याचवेळी चिमुकलीला अश्रू अनावर झाले. घरातील सदस्य गणरायाला आसनावरून उचलून घराभोवती प्रदक्षिणा घालतात. याचवेळी चिमुकली धाय मोकलून रडायला सुरूवात करते.

'गणरायाला घरी पाठवू नका' असं म्हणत जोरजोराने रडू लागते. विसर्जनावेळी ती आईचा पदर खेचून रडते. घरातील सदस्य तिची समजूत काढतात, मात्र ती ऐकत नाही. तिचं रडणं सुरू असतं. सध्या चिमुकलीचा व्हिडिओ सोशल मीडियात व्हायरल होत आहे. श्रीजाच्या निरागस श्रद्धेने सर्वांचे मन जिंकले आहे.

दरम्यान, थोरात कुटुंबीयांनी पर्यावरणपूरक निर्णय घेत घरच्या घरीच टबमध्ये बाप्पाचे विसर्जन केले. विशेष म्हणजे विसर्जनानंतर त्या मातीत एक झाड लावण्याचा संकल्प त्यांनी केला असून, त्यांच्या या उपक्रमाचे सर्वत्र कौतुक होत आहे.