साताऱ्यानंतर अमरावतीत उच्चशिक्षित तरूणीचा आढळला मृतदेह; राहत्या घरात आयुष्याचा दोर कापला

सध्या राज्यात साताऱ्यातील फलटण येथील प्रकरण तापलं आहे. डॉक्टर तरूणीच्या आत्महत्येनंतर दोन जणांना पोलिसांनी ताब्यात घेतलं. हे प्रकरण पोलीस आणि राजकीय दबावामुळे घडलं असल्याचं समोर आलं आहे. असंच एक प्रकरण अमरावतमधील बडनेरामधून समोर येत आहे. २७ वर्षीय उच्चशिक्षित युवतीनं आत्महत्या केली आहे. सध्या पोलिसांकडून अधिक तपास सुरू आहे.

रणदीप कौर रियाड (वय वर्ष २७) असे उच्चशिक्षित (एमएससी) युवतीचं नाव आहे. ही तरूणी बडनेरा येथील रहिवासी होती. ती उदरनिर्वाहासाठी एका खासगी कोचिंग क्लासेसमध्ये शिकवत होती. मात्र, तिचा राहत्या घरात गळफास घेतलेल्या अवस्थेत मृतदेह आढळला. तरूणीचा मृतदेह आढळल्यानंतर पोलिसांनी घटनास्थळी धाव घेतली.

तसेच बडनेरा पोलिसांनी मृतदेह ताब्यात घेत पंचनामा केला. तसेच अमरावती जिल्हा सामान्य रुग्णालयात शवविच्छेदनासाठी पाठवले. या प्रकरणाचा सखोल तपास सध्या पोलिसांकडून सुरू आहे. तरूणीनं आत्महत्या का केली? आत्महत्या करण्यामागचं कारण काय? याचा तपास पोलिसांकडून सुरू आहे. दरम्यान, या घटनेनंतर परिसरात खळबळ उडाली आहे.