Akola News : धक्कादायक! अकोल्यात खिचडीत पडली पाल, चिमुकल्यांसह 15 जणांना विषबाधा

Akola News : अंगणवाडीतील मुलांना मिळणाऱ्या पोषण आहारात पाल पडल्याने विषबाधा झाल्याचा धक्कादायक प्रकार उघडकीस आला आहे. अकोल्यातील बार्शीटाकळी तालुक्यातील सारकीन्ही गावात हा प्रकार घडला आहे. या घटनेत खिचड़ी खाल्ल्याने 12 चिमुकल्यासह तीन महिलांना विषबाधा झाली आहे. बाधित झालेल्या चिमुकल्यांसह महिलांवर सध्या उपचार सुरू असल्याची माहिती आहे.

आता सर्व बधितांची प्रकृती चांगली असल्याचे वैद्यकिय अधिकारी इंगळे यांनी सांगितले. दरम्यान अंगणवाडीच्या विद्यार्थ्यांना (Student) पोषण आहार देण्यासाठी तांदळाची खिचडी शिजवायला टाकली, त्यावर झाकण न ठेवल्यामुळे त्या खिचड़ीच्या पातेल्यात पाल पडली आणि तीच खिचडी मुलांना खायला दिली आणि त्यातून चिमुकल्यांना विषबाधा (Food Poison) झाली असल्याची माहिती आहे.

आरोग्याच्या दृष्टिकोनातून या सर्व बधितांना तातडीने प्राथमिक आरोग्य केंद्रात उपचारार्थी दाखल करण्यात आले. दरम्यान, खिचडी बनवताना हलगर्जी करणाऱ्यांविरुद्ध कार्यवाही करावी, अशी मागणी आता गावकऱ्यांकडून करण्यात येत आहे.