Akola Crime News: नवऱ्याने आणि पोटच्या मुलांनी आईला पाजलं विष; काळजात धडकी भरवणारं कारण आलं समोर

Akola News: अकोल्यातून नात्याला काळिंमा फासणारी एक मोठी बातमी समोर आली आहे. संपत्तीसाठी पोटच्या मुलांनीच आपल्या आईला विष पाजलं आहे. या कटात महिलेचा पती देखील सहभागी आहे. आपल्या दोन्ही मुलांंना हाताशी धरुन त्याने पत्नीला विष पाजलंय.

याबाबत अधिक माहिती अशी की, अकोला जिल्हातल्या बोरगाव पोलीस स्टेशन अंतर्गत येत असलेल्या म्हैसांग येथे ही धक्कादायक घटना घडली आहे. या घटनेत वंदना भिमराव गवई असं विष पाजलेल्या महिलेचं नाव आहे.

संपत्तीसाठी मती भ्रष्ट

पती आणि मुलं आपल्या आईच्या नावावर असलेलं घर आणि शेती आपल्या नावावर करण्यास सांगत होते. शेती आणि घर नावावर करून देण्यासाठी गेल्या अनेक दिवसांपासून या महिलेचा छळ करण्यात येत होता. मात्र महिला सर्वकाही सहन करत होती आणि त्यांना नकार देत होती.

घर आणि शेती नावावर करून देण्यास नकार दिल्याने दोन सख्या मुलांनी आणि नवऱ्याने मिळून महिलेला संपवण्याचा निर्णय घेतला. त्यांंनी महिलेला विष पाजले. सध्या महिला जिल्हा सामान्य रुग्णालयात मृत्यूशी झुंज देत आहे. तर बोरगाव पोलीस स्टेशनमध्ये मुलं, सुना,आणि नवऱ्याच्या विरोधात तक्रार दाखल करण्यात आली आहे.