Akola By-poll: अकोल्यामध्ये पोटनिवडणुकीत काँग्रेस-ठाकरेसेनेचा विजय, कुठे कुणी मारली बाजी? वाचा विजय उमेदवारांची नावं

• अकोल्याच्या पातूर नगरपालिकेत काँग्रेस-ठाकरेसेना आघाडीचा विजय

• इद्दू पैलवान नगराध्यक्षपदी विजयी झाले

• भाजपला पातूरमध्ये मर्यादित यश मिळाले पण अकोटमध्ये दुहेरी विजय

• अकोला जिल्ह्यातील स्थानिक राजकारणात मोठी उलथापालथ

अकोला जिल्ह्यातील पातूर नगरपालिका निवडणुकीसाठी काल उत्साहात मतदान प्रक्रिया पार पडली. पातूरातील 20 सदस्य आणि नगराध्यक्ष पदाच्या जागेसाठी हे मतदान झालं. येथे सदस्य पदाच्या 20 जागांसाठी 75 उमेदवार निवडणुकीच्या रिंगणात होते. नगराध्यक्षपदासाठी ५ उमेदवार निवडणूक रिंगणात होते. पातूर या ठिकाणी 73.33 टक्के इतकं मतदान झालं होतं. या निवडणुकीत विविध पक्ष आणि आघाड्या निवडणूक रिंगणात उतरल्या होत्या. पातूर नगरपालिकेत महायुतीतील भाजप आणि शिंदे यांची शिवसेना स्वबळावर लढली. तर महाविकास आघाडीतील काँग्रेस आणि ठाकरेंची शिवसेना नगरपालिकेत एकत्र लढली.

महाविकास आघाडीच्या वतीने येथे काँग्रेसचे हिदायत खान रूम खान उर्फ इद्दू पैलवान नगराध्यक्ष पदाचे उमेदवार होते. महायुतीतील महत्त्वाचा घटक पक्ष असलेल्या अजित पवारांच्या राष्ट्रवादीने स्थानिक आघाडीची स्थापना करत त्यात वंचित आणि एमआयएमला सामावून घेतले होते. या आघाडीकडून माजी नगराध्यक्ष सय्यद बुरहान नगराध्यक्ष पदाचे उमेदवार होते. तर भाजपने येथे नगराध्यक्षपदासाठी सचिन ढोणे यांना रिंगणात उतरवलं होतं. तर शिंदेंच्या शिवसेनेने सुभाष कोचरे यांना नगराध्यक्षपदाच्या उमेदवारीची संधी दिली होती. मात्र इथे प्रमुख लढत ही काँग्रेस आणि अजित पवारांची राष्ट्रवादी, वंचित आणि एमआयएम यांच्या एकत्रित 'विकास योद्धा पॅनल'मध्येच होती.

अकोला जिल्ह्यातील पातूर नगरपालिकेवर काँग्रेस- शिवसेना उबाठा आघाडीचे वर्चस्व आहे. पातूरच्या नगराध्यक्षपदी काँग्रेसचे हिदायत खान रूम खान उर्फ इद्दू पैलवान विजयी झाले. अजित पवारांच्या राष्ट्रवादीच्या विकास योद्धा पॅनलचे सय्यद बुऱ्हाण नबी यांचा 1601 मतांनी पराभव केला. इद्दू पैलवान यांना 6009 मते मिळाली. तर राष्ट्रवादी, वंचित आणि एमआयएम आघाडीचे बुऱ्हान नबी यांना 4408 मते मिळाली. भाजपचे सचिन ढोणे तिसऱ्या क्रमांकावर आहेत. तर शिंदेसेनेच्या सुभाष बोचरे यांना फक्त 194 मते मिळाली.

अकोट नगर परिषदमधील प्रभाग 4 मध्ये भाजपचा दुहेरी विजय झाला. नगरसेवकांच्या 2 पोटनिवडणूक जागांवर भाजपने विजयी मिळवला. भाजपचे उमेश हरसुलकर यांनी 1401 मते मिळवत शिंदेशिवसेनेच्या रेश्मा चंदन यांचा पराभव केला. भाजपच्या शारदा योगेश नाठे यांनी देखील 1706 मते मिळवत दणदणीत विजय मिळवला. त्यांनी भारती प्रशांत नाठे यांचा 778 मतांनी पराभव केला. दरम्यान, आता अकोट नगरपालिकामध्ये भाजपच्या पक्षीय बलाबल संकेत 2 जागांहून वाढ झालीय. आता 11 जागांहून थेट 13 नगरसेवक भाजपचे या ठिकाणी असणार आहे.

पातूर नगरपालिकेतील पक्षीय बलाबल:

एकूण जागा : 20

- काँग्रेस 08

- शिवसेना उबाठा : 02

- भाजप : 02

- विकास योद्धा आघाडी ( राष्ट्रवादी अजित पवार- वंचित- एमआयएम) : 08