Ahmednagar News: अल्‍पवयीन मुलांनी फोडले मोबाईल शॉपी; पोलिस तपासात उलगडा

सुशिल थोरात

अहमदनगर : कर्जत तालुक्यातील मिरजगाव येथील मोबाईल शॉपीचे दुकान फोडून लाखो रुपयांचे (Mobile) मोबाईल, स्मार्ट वॉचच्या चोरीचा उलगडा झाला आहे. या चोरीप्रकरणी धक्कादायक प्रकार समोर आला आहे. चोरी (Theft) करणारे चोर हे अल्पवयीन मुले असून स्थानिक गुन्हे शाखेच्या पथकाने या चोरी प्रकरणी तीन अल्पवयीन मुलांना बीड (Beed) जिल्ह्यातील केळसांगवी गावातून ताब्यात घेतले आहे. (Live Marathi News)

मिरजगांव येथील श्रीगणेश मोबाईल शॉपीचे दुकान फोडून मोबाईल फोन, स्मार्ट वॉच आणि रोख रक्कम असा सुमारे ३ लाख ७४ हजार रुपये किंमतीचा माल चोरीला गेला होता. याबाबतची फिर्याद शेखर रामदास बनसोडे यांनी मिरजगांव पोलीस स्टेशन येथे नोंदवली होती. चोरीचा तपास करताना अहमदनगरच्या स्थानिक गुन्हे शाखेच्या पथकाने बीड जिल्ह्यातील केळसांगवी या गावातून तीन अल्पवयीन मुलांना ताब्यात घेत त्यांच्याकडून चोरी गेलेला मुद्देमाल हस्तगत केला आहे.

कोंबड्याच्या खुराड्यामध्ये लपवला मुद्देमाल

विशेष म्हणजे या तीन अल्पवयीन मुलांनी हा सर्व माल आपल्या घराजवळील एका कोंबड्याच्या खुराड्यामध्ये लपवला होता. तिन्ही मुले सराईत चोर नसल्यामुळे पोलिसांना तपास करताना मोठी अडचण निर्माण झाली होती. मात्र दुकानातील काही गोष्टींच्या निरीक्षणावरून स्थानिक गुन्हे शाखेच्या पथकाने या अल्पवयीन मुलांपर्यंत तपासाची दिशा नेली होती. अखेर या चोरीचा उलगडा करण्यात पोलिसांना यश आल्‍याची माहिती स्थानिक गुन्हे शाखेचे पोलीस निरीक्षक अनिल कटके यांनी दिली.