CNG Project : साखर कारखान्यातून CNG निर्मिती; कोपरगावमधील साखर कारखाना ठरला देशातील पहिला

सचिन बनसोडे 

कोपरगाव (अहिल्यानगर) : साखर कारखान्यांमध्ये उसाच्या टाकाऊ पदार्थांपासून सीएनजी तयार करण्याची प्रक्रिया सुरु झाली आहे. हा एक पर्यावरणपूरक असा प्रकल्प असून कोपरगाव मधील सहकार महर्षी शंकरराव कोल्हे सहकारी साखर कारखान्यात आता सीएनजी निर्मिती केली जात आहे. अर्थात सीएनजी निर्मिती करणारा हा देशातील पहिला साखर कारखाना ठरला आहे. 

आजच्या काळात पेट्रोल, डिझेल इंधनावर चालणाऱ्या वाहनांसोबत सीएनजी गॅसवर चालणाऱ्या वाहनांची संख्या देखील वाढत आहे. अर्थात याच्या वापरामुळे पर्यावरणाला होणारी हानी कमी असल्याने वापर वाढू लागला आहे. गुजरात राज्यात याचे मोठे प्रकल्प असून आता महाराष्ट्रात देखील सीएनजी निर्मितीचा प्रकल्प उभारणीचे काम कोपरगाव येथील सहकार महर्षी शंकरराव कोल्हे सहकारी साखर कारखान्याने केले आहे. 

दररोज होणार १२ टन सीएनजी निर्मिती 
अहिल्यानगर जिल्ह्यातील कोपरगाव येथील सहकार महर्षी शंकरराव कोल्हे सहकारी साखर कारखाना CNG निर्मिती करणारा देशातील पहिला सहकारी साखर कारखाना ठरला आहे. अन्नदाता ते उर्जादाता या संकल्पनेतून ५० कोटी रुपये खर्चून साखर कारखान्यात सीएनजी प्रकल्प उभारण्यात आला आहे. या प्रकल्पातून दररोज १२ टन सीएनजी निर्मिती केली जाणार असून पेट्रोलियम कंपन्यांना गॅस विक्री केली जाणार असल्याने कारखान्याच्या उत्पन्नात वाढ होणार आहे. 

५ ऑक्टोबरला होणार शुभारंभ  

साखर कारखान्याचे वाया जाणारे सांडपाणी आणि डिस्लेरी स्पेंड यातून मिथेन काढून सीएनजी तयार केला जाणार आहे. दरम्यान कोपरगाव येथे उभारण्यात आलेल्या सीएनजी प्रकल्पाचे उद्घाटन केंद्रीय सहकार तथा गृहमंत्री अमित शहा यांच्या हस्ते ५ ऑक्टोबर रोजी होणार आहे. यानंतर प्रत्यक्षात या प्रकल्पातून सीएनजी निर्मिती करून विक्रीसाठी सुरवात केली जाणार आहे.