Ahilyanagar News : जम्मू- काश्मीरमधील ९ जण ताब्यात; बनावट बंदूक परवाना घेत करायचे सुरक्षा रक्षकाची नोकरी

सुशील थोरात 

अहिल्यानगर : अहिल्यानगरमध्ये बनावट बंदूक परवाना घेऊन सुरक्षा रक्षकाची नोकरी करणाऱ्या जम्मू काश्मीरमधील ९ जणांना पोलिसांनी ताब्यात घेतले आहे. त्यांच्याकडून १२ बोअर, ९ रायफल आणि ५८ काडतूस जप्त केले आहेत. सदरची कारवाई मिलिटरी इंटेलिजन्स आणि तोफखाना पोलिसांनी केली आहे. 

सुरक्षारक्षक म्हणून नोकरीसाठी बनावट बंदूक परवाना घेऊन नोकरी मिळवणाऱ्या जम्मू कश्मीर येथील ९ जणांना मिलिटरी इंटेलिजन्स आणि तोफखाना (Police) पोलिसांनीं अटक केली आहे. त्यांच्याकडून १२ बोअर, ९ रायफल आणि ५८ काडतूसे जप्त करण्यात आली आहे. या प्रकरणी पोलिसांनी जम्मू काश्मीर येथील राजौरी जिल्हाधिकारी कार्यालयाकडून बंदूक परवण्याची माहिती मागविण्यात आली. मात्र हे शस्त्र परवाने बनावट असल्याचे त्यांनी कळवताच पोलिसांनी ९ जणांना अटक केली आहे. यामधील सर्व जण हे (Jammu And Kashmir) जम्मू काश्मीरमधील राजौरी जिल्ह्यातील रहिवासी असल्याचे निष्पन्न झाले आहे. 

जम्मू काश्मीरमधील हे ९ जण नगर जिल्ह्यात खोट्या कागदपत्राच्या आधारे सुरक्षारक्षक म्हणून काम करत असल्याची माहिती मिलिटरी इंटेलिजन्स यांना मिळाली होती. त्यानुसार तोफखाना पोलीस यांच्या मदतीने ही कारवाई करण्यात आली आहे. या प्रकरणी तोफखाना पोलीस ठाण्यात आर्म एक्टसह गुन्हा दाखल करण्यात आला आहे.

पोस्टाच्या पार्सलद्वारे मागविलेली तलवार जप्त
जालना : पोस्टाच्या पार्सल द्वारे जालना शहरामध्ये मागविलेली तलवार पोलिसांनी जप्त केली. जालना स्थानिक गुन्हे शाखेच्या पथकाने ही कारवाई केली. जालना शहरातील वाल्मीकनगर येथे राहणाऱ्या आदित्य संजय चंडालिया याने एक धारधार तलवार पोस्टाद्वारे मागवली असल्याची गुप्त माहिती गुन्हे शाखेच्या पथकाला मिळाली होती. पोस्टाद्वारे मागवलेल्या तलवारीची आज डिलीव्हरी होणार असल्याची माहिती स्थानिक गुन्हे शाखेच्या पथकाला प्राप्त झाली. त्या माहितीवरून गुन्हे शाखेच्या पथकाने जालना शहरातील हेड पोस्ट ऑफीस परिसरात सापळा लाऊन आदित्य चंडालिया यास ताब्यात घेतले.