ओमायक्रॉनच्या पार्श्वभूमीवर सांगली जिल्ह्यात परदेशातून परतले 99 प्रवासी!

सांगली : ओमायक्रॉन व्हेरियंट विषाणूच्या पार्श्वभूमीवर परदेशातून सांगली मिरज आणि कुपवाड शहर महापालिका क्षेत्रात एकूण 99 प्रवासी आल्याची नोंद झाली आहे. यापैकी महापालिकेच्या वैद्यकीय पथकाकडून आत्तापर्यंत 51 जणांशी संपर्क करण्यात आला असून यापैकी 11 प्रवासी आणि त्यांच्या जवळच्या संपर्कातील 5 जण अशा 16 जणांची आर्टिपीसीआर टेस्ट करण्यात आली आहे. महापालिकेकडून 20 टिमद्वारे उर्वरित प्रवाशांशी संपर्क साधण्याचे काम सुरू आहे. तर महापालिकेची वैद्यकीय यंत्रणा अलर्ट झाली आहे.

हे देखील पहा :

परदेशातून महापालिका क्षेत्रात आलेल्या 99 प्रवाशांची माहिती महापालिका प्रशासनाला प्राप्त झाल्यानंतर या सर्व प्रवाशांशी संपर्क साधून माहिती घेणे आज सुरू होते. यामध्ये लंडन, दुबई, कतार, यूएसई, जपान या भागातून प्रवासी आल्याचे समजल्यानंतर 20 वॉर्डात एकूण 20 टिम आणि 60 आरोग्य कर्मचारी यांच्या माध्यमातून परदेशातून आलेल्या प्रवाशांचा शोध सुरू करण्यात आला होता.

परदेशातून आलेल्या एकूण 99 प्रवाशांपैकी 51 जणांशी संपर्क झाला असून त्यातील 11 प्रवासी आणि 5 जवळच्या संपर्कातील 16 जणांचे आर्टीपीसीआरचे नमुने घेण्यात आले आहेत. 99 पैकी 35 प्रवासी हे यापूर्वीच परतले आहेत. संपर्क झालेल्या 11 प्रवासी आणि जवळच्या संपर्कातील 5 अशा 16 जणांना वैद्यकीय पथकाच्या निगराणीखाली ठेवण्यात आले असून दोन दिवसात आर्टिपीसीआरचा रिपोर्ट आल्यानंतर याबाबत पुढील निर्णय घेणेत येईल अशी माहिती डॉ.वैभव पाटील यांनी दिली.

Edited By : Krushnarav Sathe