Dhule Factory Blast : धुळ्यात मेणबत्तीच्या कारखान्यात मोठा स्फोट, 4 महिलांचा जागीच मृत्यू, 2 जखमी

Dhule Factory Blast News : धुळ्यामध्ये (Dhule) भयंकर घटना घडली आहे. मेणबत्ती निर्मितीच्या (Candle Factory) कारखान्यात भीषण स्फोट झाला. या स्फोटात चार महिलांचा दुर्दैवी मृत्यू झाला. तर दोन कर्मचारी गंभीर जखमी झाले आहेत. जखमींना नंदुरबार येथील सरकारी रुग्णालयात उपचारांसाठी दाखल करण्यात आले आहे.

मिळालेल्या माहितीनुसार, धुळ्यातील भवानी सेलिब्रेशन या मेणबत्ती निर्मिती करणाऱ्या कारखान्यात मंगळवारी दुपारी अचानक स्फोट झाला. धुळ्यातील साक्री तालुक्यातील चिपलीपाडा येथे हा कारखाना आहे. या भीषण स्फोटात चार महिलांचा जागीच मृत्यू झाला. तर तेथील दोन कर्मचारी जखमी झाले आहेत. या भीषण स्फोटामागील कारण अद्याप कळू शकलेले नाही.

या कारखान्यात काम करणाऱ्या चार महिलांचा आगीमध्ये होरपळून मृत्यू झाला. तर दोन कर्मचारी गंभीर जखमी झाले आहेत. या जखमींना स्थानिक नागरिकांनी तात्काळ नंदुरबार येथील शासकीय रुग्णालयात उपचारासाठी दाखल करण्यात आले. दोन्ही जखमींची प्रकृती चिंताजनक असल्याचे सांगितले जात आहे. या स्फोटात मृत्यू झालेल्या महिलांचे मृतदेह शवविच्छेदनासाठी रुग्णालयात पाठवण्यात आले आहेत. दरम्यान, धुळे साक्री पोलिसांनी घटनास्थळी धाव घेत तपास सुरु केला आहे.