Assembly Election: मविआमध्ये तिढा, शरद पवार गट अन् समाजवादी पक्ष आमने-सामने, दोन्ही पक्षाचा एकाच वेळी २ जागांवर दावा!

सुनिल काळे, साम प्रतिनिधी

राज्यात काही दिवसातच विधानसभा निवडणुका जाहीर होणार आहेत. या पार्श्वभूमीवर महाविकास आघाडी आणि महायुतीमध्ये जागावाटपाबाबत बैठका सुरू आहेत. सुत्रांनी दिलेल्या माहितीनुसार १५० जागांबाबत मविआत सहमती झालीय. त्याचवेळी भिवंडी पूर्व आणि अणुशक्तीनगर या मतदारसंघावरून शरद पवार गट अन् समाजवादी पक्ष आमने-सामने आलेत.

भिवंडी पूर्व आणि अणुशक्तीनगर या मतदारसंघावरुन महाविकास आघाडीत बिघाडी होण्याची शक्यता निर्माण झालीय. समाजवादी पक्षाच्या मागणीला राष्ट्रवादी काँग्रेस शरदचंद्र पवार गटाने नकार दिलाय. त्यामुळे आता सपा काय निर्णय घेणार पाहाणं औत्सुक्याचं ठरत आहे. विशेष म्हणेज सध्या या मतदारसंघातून अभिनेत्री स्वरा भास्करचा नवरा फहाद अहमद समाजवादी पक्षाकडून निवडणूक लढवण्यास इच्छुक आहे.

सपाने मागितलेल्या दोन्ही मतदारसंघ सोडण्यास राष्ट्रवादी काँग्रेस शरदचंद्र पवार पक्षाने नकार दिलाय. दरम्यान २०१९ साली भिवंडी पूर्व विधानसभा राष्ट्रवादी काँग्रेस पक्षाचा कोट्यातून समाजवादी पक्षाने लढवली होती. मात्र यावेळी भिवंडी पूर्व विधानसभा आणि अणुशक्तीनगर विधानसभा राष्ट्रवादी काँग्रेस शरदचंद्र पवार पक्ष लढण्यास ठाम आहेत. अणुशक्तीनगर विधानसभेचा जो कोणी उमेदवार असेल तो तुतारी वाजवणारा माणूस चिन्हावरच लढेल, असा राष्ट्रवादी काँग्रेस शरदचंद्र पवार पक्षाचा पवित्रा घेतल्याची माहिती सुत्रांनी दिलीय.