Baramati Assembly: बारामतीचा पुतण्या पडणार? अजित पवार की युगेंद्र पवार? बारामतीकरांचा कौल कुणाला?

भरत मोहोळकर, साम प्रतिनिधी

बारामतीच्या काका-पुतण्या या लढतीत अजित पवार बाजी मारणार की युगेंद्र पवार? यापेक्षा बारामतीच्या सांगता सभेची जोरदार चर्चा रंगलीय. कारण अजित पवारांनी बारामतीतील शरद पवारांची पारंपरिक सांगता सभेचं मैदानच हायजॅक केलंय...त्यामुळे सध्या बारामतीच्या लढतीपेक्षा पवारांच्या सांगता सभेचीच जास्त चर्चा रंगलीय. त्यामुळे या सभेतल्या भाषणाकडेच जास्त लक्ष लागलंय.

लोकसभा निवडणुकीत अजित पवारांच्या पत्नी सुनेत्रा पवारांचा सुप्रिया सुळेंनी पराभव केला. त्यावेळी बारामतीतील लोकांमध्ये भावनिक लाट पसरली होती. मात्र आता विधानसभेला बारामतीचा प्रचार कोणत्या मुद्द्यांभोवती फिरतोय? पाहूयात..

बारामतीच्या निवडणुकीतील मुद्दे

लोकसभेला ताई तर विधानसभेला दादा अशी अजितदादांची साद

बारामतीत हजारो कोटींचा निधी मंजूर केल्याचा दादांचा दावा

पवारांनंतर बारामतीचा वाली मीच, दादांचं विधान

बारामतीत भ्रष्टाचार, गुन्हेगारी वाढल्याचा युगेंद्र पवारांचा दावा

विकास, निष्ठा आणि भावनिक मुद्दे महत्वाचे ठरणार

शरद पवार हे 1967 पासून प्रचाराची सांगता सभा ही बारामतीतील मिशन हायस्कूलच्या बंगला मैदानावर घेत होते. मात्र या मैदानाची परवानगी अजित पवारांना मिळाल्याने पवारांना मुलगी सुप्रिया सुळेंच्या सांगता सभेप्रमाणेच नातू युगेंद्र पवारांसाठी लेंडीपट्टा मैदानावर सभा घ्यावी लागणार आहे.

आतापर्यंत मिशन बंगला मैदानावरच्या सांगता सभेतला पवारांचा शब्द बारामतीकरांनी पाळलाय. मात्र लोकसभेप्रमाणे बदललेल्या लेंडीपट्टा मैदानावरील सांगता सभेतला पवारांचा शब्द बारामतीकर पाळणार की अजितदादांच्या हाकेला प्रतिसाद देणार याची उत्सुकता केवळ बारामतीकरांनाच नव्हे तर सा-या राज्याला लागलीय.