मराठा आरक्षणासाठी आंदोलन पुकारणारे मनोज जरांगे पाटील हे वंचित बहुजन आघाडीकडून लोकसभेची निवडणूक लढवणार, अशी जोरदार चर्चा सुरू झाली आहे. त्यामागचं कारणही तसंच आहे. वंचित बहुजन आघाडीचे अध्यक्ष प्रकाश आंबेडकर यांनी मंगळवारी (ता. २६) रात्री अंतरवाली सराटीत जाऊन मनोज जरांगे यांची भेट घेतली आहे. या भेटीनंतर प्रकाश आंबेडकर यांनी तसे संकेत दिले आहेत. (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)
लोकसभा निवडणुकीसंदर्भात आम्ही मनोज जरांगे पाटील यांची भेट घेतली असून त्यांची पुढील वाटचाल नेमकी कशी असेल, याबाबत चर्चा केल्याचं प्रकाश आंबेडकर यांनी सांगितलं आहे. आमची चर्चा सकारात्मक झाली असून लवकरच याबाबत निर्णय जाहीर करू, असंही प्रकाश आंबेडकर यांनी म्हटलं आहे. (Lok Sabha Election 2024)
दुसरीकडे प्रकाश आंबेडकर यांची सदिच्छा भेट असून आमची कोणतीही राजकीय चर्चा झाली नाही, असं म्हणत मनोज जरांगे पाटील यांनी या चर्चांचं खंडण केलं आहे. मी समाजाला ३० तारखेपर्यंत निर्णय देतो असं सांगितलं आहे, त्यामुळे मी आज काय चर्चा झाली हे ३० तारखेलाच सांगणार, असंही जरांगे यांनी म्हटलं आहे. (Latest Marathi News)
मी स्वार्थी नसून मला कुठलंही राजकारण करायचं नाही. माझा उद्देश सामाजिक चळवळीचा असून मी जनआंदोलनातून गोरगरीब मराठ्यांना आरक्षण मिळवून देणार असल्याचं जरांगे यांनी म्हटलं आहे. प्रत्येक मतदारसंघातील एक अपक्ष उमेदवार देण्याबाबत आमचा निर्णय झाला आहे. यासाठी आम्ही प्रत्येक गावागावात जाऊन विचारणार आहोत, असंही जरांगे यांनी सांगितलं आहे.
दरम्यान, मनोज जरांगे यांनी लोकसभा निवडणूक लढवावी. ते जालन्यातून लोकसभा निवडणूक लढवणार असतील तर त्यांना आमचा पाठिंबा असेल, असं प्रकाश आंबेडकर यांनी काही दिवसांपूर्वी म्हटलं होतं. त्यातच आता प्रकाश आंबेडकर यांनी अचानक जरांगेंची भेट घेऊन लोकसभेबाबत चर्चा केल्याने मनोज जरांगे हे जालन्यातून वंचित बहुजन आघाडीचे उमेदवार असणार का? अशी चर्चा सुरू झाली आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
