Maharashatra Election: बारामतीच्या आखाड्यात नव्या एन्ट्रीनं ट्विस्ट; सुनंदा पवार यांनी घेतला उमेदवारी अर्ज

(सागर आव्हाड, बारामती)

Baramati Loksabha Election Constituency Sunanda Pawar Candidate Nomination Form :

बारामती लोकसभा निवडणूक अधिकच रोचक बनत चाललीय. राज्यात बारामतीमधील लोकसभेची निवडणूक चुरशीची असते. यंदा नणंदविरुद्ध भावजय असा सामना रंगणार आहे. या मतदारसंघातून रोहित पवार यांच्या आई सुनंदा पवार यांनीही उमेदवारी अर्ज घेतलाय. यामुळे या निवडणुकीकडे सर्वांचं लक्ष वेधलं गेलंय. शरद पवार यांचे निकटवर्तीय असलेले लक्ष्मण खाबिया यांनी सुनंदा राजेंद्र पवार यांच्यासाठी निवडणूक निर्णय अधिकाऱ्याकडून अर्ज घेतलाय. सुनंदा पवार यांनी महाविकास आघाडीकडून उमेदवारी अर्ज घेतलाय.

भीमथडी जत्रा आणि बारामती अॅग्रोच्या माध्यमातून सुनंदा पवार यांचा जिल्हाभर संपर्क असून त्यांच्या कामातून त्यांनी ओळखलं जातं. लोकसभा निवडणुकीचा उमेदवारी अर्ज भरल्याने सुनंदा पवार यांचे नाव आता चर्चेत आले आहे. दरम्यान बारामती मतदारसंघातून सुप्रिया सुळे ह्या महाविकास आघाडीच्या अधिकृत उमेदवार आहेत. जर सुप्रिया सुळे यांचा उमेदवारी अर्ज कोणत्या कारणामुळे बाद झाला किंवा अर्जात काही त्रुटी आढळल्या तर पर्यायी अर्ज म्हणून सुनंदा राजेंद्र पवार यांचा अर्ज भरण्यात आलाय. त्यामुळे आता रोहित पवार यांच्या आईही निवडणुकीच्या आखाड्यात उतरल्या आहेत, असं म्हटलं तरी वावगं ठरणार नाही.

अजित पवारांनीही घेतला उमेदवारी अर्ज

बारामती लोकसभा मतदारसंघात उमेदवारांनी अर्ज भरण्यास सुरुवात झाली आहे. या लोकसभा मतदारसंघात महाविकास आघाडीकडून सुप्रिया सुळे आणि महायुतीकडून सुनेत्रा पवार या १८ एप्रिल रोजी उमेदवारी अर्ज दाखल करणार आहेत. तसेच या मतदारसंघात अर्ज काही कारणांनी छाननीमध्ये रद्द झाल्यास उमेदवारीबाबात प्रश्न उभा राहू नये म्हणून दोन्ही पक्षांकडून अधिकचा उमेदवारी अर्ज घेतला आहे.

दोन्ही पक्षांच्या नेत्यांकडून निवडणूक निर्णय अधिकारी कार्यालयातून उमेदवारी अर्ज घेण्यात आले आहेत. सुनेत्रा पवार यांच्या नावाने उमेदवारी अर्ज घेण्यात आला आहे, तसेच अजित पवार यांच्या नावानेही अर्ज घेण्यात आला आहे. महाविकास आघाडीकडून सुप्रिया सुळे यांच्या नावाने उमेदवारी अर्ज घेतला आहे. तसेच सचिन दोडके यांच्याही नावाने अर्ज घेण्यात आल्याची माहिती समोर आली आहे.