महाराष्ट्रातील ४८ लोकसभा मतदारसंघात मतमोजणी सुरू असून निवडणुकांचे कल समोर येत आहेत. रत्नागिरी सिंधुदुर्ग मतदारसंघातून महायुतीचे उमेदवार नारायण राणे यांनी मोठी आघाडी घेतली आहे. त्यांनी महाविकास आघाडीचे उमेदवार विनायक राऊत यांना पिछाडीवर सोडलं आहे. दरम्यान, वडिलांच्या आघाडीनंतर आमदार नितेश राणे यांनी जल्लोष केला. त्यांनी आईला मिठी मारून उचलून घेतलं. या जल्लोषाचा व्हिडीओ समोर आला आहे.
चौदाव्या फेरी अखेर नारायण राणे यांना २ लाख ६७ हजार ६९० इतकी मते मिळाली आहे. तर विनायक राऊत यांना २ लाख ४० हजार ४३१ इतकी मते पडली आहे. त्यामुळे नारायण राणे यांनी तब्बल २७ हजार २५९ मतांची आघाडी घेतली आहे. वडिलांनी आघाडी घेताच आमदार नितेश राणे यांनी मोठा जल्लोष केला आहे.
मतमोजणी केंद्राबाहेरच आमदार राणे यांनी कार्यकर्त्यांसोबत जल्लोष केलाय. यावेळी त्यांच्या आई देखील सोबत होत्या. नारायण राणे यांच्या आघाडीनंतर नितेश राणे यांनी आईला मिठी मारली. इतकंच नाही, तर त्यांनी आईला मिठी मारत उचलून घेतलं. त्यांच्या या जल्लोषाचा व्हिडीओ समोर आला आहे.
कोकण हा शिवसेनेचा बालेकिल्ला मानला जातो. या ठिकाणी महायुतीचे उमेदवार नारायण राणे आणि महाविकास आघाडीचे उमेदवार विनायक राऊत यांच्यात अटीतटीची लढत होणार हे आधीपासूनच स्पष्ट होते. आज मतमोजणीच्या पहिल्या फेरीपासून नारायण राणे यांनी आघाडी घेतली. दुसऱ्या फेरीमध्ये त्यांची आघाडी वाढून १,२०२ इतकी झाली.
मात्र, पहिल्या दोन फेऱ्यांमध्ये पिछाडीवर पडलेल्या राऊतांनी तिसऱ्या फेरीत चांगली लिड घेत नारायण राणे यांच्यावर ३० मतांची आघाडी घेतली. पण त्यानंतर चौथ्या फेरीपासून राणेंच्या मताधिक्यांमध्ये वाढच होत गेली. आता १४ व्या फेरीअखेर नारायण राणे यांच्याकडे जवळपास २८ हजार मतांची आघाडी आहे. अजूनही मतमोजणीच्या ११ फेऱ्या होणार आहे. या फेरीत मतदार नेमका कुणाला कौल देणार, याकडे सर्वांचं लक्ष लागून आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.