PM Narendra Modi : यांच्या ४ पिढ्यांनी दिल्लीवर राज्य केलं, पण..., PM नरेंद्र मोदींचा इंडिया आघाडी आणि काँग्रेसवर हल्लाबोल

देशाला मजबूत सरकारची गरज असून ही निवडणूक देशाला तिसऱ्या स्थानावर घेऊन जाईल, असा विश्वास पंतप्रधान नरेंद्र मोदी यांनी व्यक्त केला. या देशाची सेवा करण्याचं भाग्य आपल्याला लाभल्याचंही ते म्हणाले. यावेळी त्यांनी इंडिया आघाडी आणि काँग्रेसवरही जोरदार टीका केली. काँग्रेसच्या चार पिढ्यांनी दिल्लीवर राज्य केलं मात्र आज त्यांच्यात ४ जागाही लढण्याची ताकद नाही. जिथे १० जनपथ आहे तिथेही काँग्रेसला लढता येत नाही, अशी अवस्था सध्या काँग्रेसची असल्याची टीका त्यांनी केली.

2024 ची ही निवडणूक भारताला जगातील तिसरी सर्वात मोठी अर्थव्यवस्था बनवण्यासाठी होत आहे. काही शक्ती देशाची अर्थव्यवस्था दिवाळखोरीत काढण्याचं काम करतायेत, अशा शक्तींपासून देशाच्या अर्थव्यवस्थेला वाचवायचं आहे. गरीब आणि मध्यम वर्गीयांचं जीवनमान उंचवायचं आहे. गरीब आणि मध्यवर्गीयांची संपत्ती हिरावून घेणाऱ्यां शक्तींपासून दूर ठेवलं पाहिजे. भारतातील तरुणांसाठी नवीन संधी निर्माण करायच्या आहेत.

2024 च्या निवडणुका या परंपरा आणि विचारसरणीचा पराभव करण्यासाठी आहेत. ज्यांनी काका-पुतणे, भाऊ-भाऊ वाद आणि घराणेशाहीमुळे वर्षानुवर्षे भारतातील तरुणांचे भविष्य उद्ध्वस्त केलं आहे. येथील विकास कामाकार्यात इंडिया आघाडी अडथळा ठरत आहे. ते दिल्लीतील जनतेला लुटण्याची एकही संधी सोडत नाहीत. हे लोक भ्रष्टाचार संपवण्याच्या नावाखाली आले, पण आज करोडो रुपये कमवत आहेत. पैशांच्या घोटाळ्यामुळे ते तुरुंगात असल्याची टीका त्यांनी केली.

मी ना माझ्यासाठी जगतो ना हा जन्म झाझ्यासाठी घेतला आहे. मी तुमच्या आणि तुमच्या मुलांच्या उज्ज्वल भविष्यासाठी खूप मेहनत घेत आहे. 50-60 वर्षांपूर्वी जेव्हा मी माझे घर सोडलं तेव्हा मला हे देखील माहित नव्हतं की एक दिवस मी लाल किल्ल्यावर तिरंगा फडकवीन. तेव्हा मला माहिती नव्हतं की 140 कोटी भारतीय माझं कुटुंब बनतील, असे उद्गार त्यांनी काढले.