Maharashtra Exit Polls 2024: महाराष्ट्रात महायुतीचा 45 पारचा नारा हुकणार? एक्झिट पोलनुसार महायुतीला घवघवीत यश नाही

लोकसभा निवडणुकीच्या 2024 च्या सातही टप्प्यांचे मतदान संपले आहे. आता सगळ्यांनाच निकालाची उत्सुकता आहे, पण त्याआधी आज एक्झिट पोलचे निकाल यायला सुरुवात झाली आहे. यातच राज्यात महायुतीला मोठा धक्का बसताना दिसत आहे. एक्झिट पोलमध्ये महायुतीचा 45 पारचा नारा हुकताना दिसत आहे.

एक्झिट पोलनुसार महाविकास आघाडीला राज्यात 20 ते 23 जागा मिळताना मिळू शकतात, असा अंदाज व्यक्त करण्यात आला आहे. यामुळे लोकसभा निवडणुकीत महायुतीच्या जागा राज्यात घटणार का? असा प्रश्न उपस्थित झाला आहे.

कोणत्या पक्षाला किती मिळणार जागा?

सी व्होटरच्या एक्झिट पोलनुसार राज्यात भाजपला 17 जागा मिळू शकतात. तर शिवसेना शिंदे गटाला 6 आणि अजित पवार गटाला फक्त 1 जागा मिळू शकते, असा अंदाज वर्तवण्यात आला आहे. तर महविकास आघाडीतील पक्ष उद्धव ठाकरे गटाला 9 जागा, काँग्रेसला 8 आणि शरद पवार गटाला 6 जागा मिळू शकतात, असा अंदाज वर्तवण्यात आला आहे.

चाणक्यनुसार महाराष्ट्रात महायुतीला 33 जागा

चाणक्यच्या एक्झिट पोलनुसार, राज्यात महायुतीला 33 जागा मिळू शकतात. तर महाविकास आघाडीला फक्त 15 जागा मिळू शकतात, असं सांगितलं आहे.