Varicose Veins: ९ ते ५ ऑफिसमध्ये बसून काम करणं धोक्याचं, वेळीच जाणून घ्या नुकसान आणि शरीरावर होणारे गंभीर परिणाम

सध्याच्या जीवनशैलीत मोठ्या प्रमाणात बदल होताना दिसत आहेत. दिवसभर ऑफिसमध्ये बसून काम करणं किंवा सतत उभं राहून काम करणं यामुळे शरीराला अनेक गंभीर आणि धोकादायक समस्यांना सामोरं जावं लागतं. तरी तज्ज्ञांच्या मते या सवयींमुळे आपल्या शिरांवर आणि पायांवर गंभीर परिणाम करू शकतात.

व्हॅस्क्युलर सर्जन डॉ. सुमित कपाडिया यांनी त्यांच्या इंस्टाग्राम पोस्टमध्ये सांगितलं की, दररोज ८ तासांपेक्षा जास्त वेळ बसून काम केल्याने रक्ताभिसरणाचा वेग मंदावतो आणि शिरांवर दबाव वाढतो. यामुळे हळूहळू व्हेरिकोज व्हेन्स (varicose veins) किंवा रक्ताच्या गाठी होण्याचा धोका वाढतो.

अधिक वेळ बसून राहिल्याने काय होऊ शकतं?

पाय सुजणे

दीर्घकाळ बसल्याने रक्ताभिसरण कमी होतं, त्यामुळे पायात सूज आणि जडपणा जाणवतो.

रक्ताच्या गाठीची समस्या

रक्त नीट वाहत नसल्याने गाठी (clots) तयार होऊ शकतात, ज्या धोकादायक असतात.

व्हेरिकोज व्हेन्स

शिरांची भिंत कमकुवत झाल्यास त्या फुगतात, दुखतात आणि दिसायलाही वाईट दिसतात.

५ सोप्या टिप्स

१. दर ३० ते ६० मिनिटांनी उभं राहा आणि स्ट्रेचिंग करा.

२. प्रत्येक तासाला काही मिनिटे चालण्याची सवय लावा.

३. बसून काम करताना पाय हलवा, अँकल पंप करा.

४. पुरेसं पाणी प्या, यामुळे रक्तप्रवाह सुधारतो.

५. कॉम्प्रेशन सॉक्स वापरा, जर शिरांचे त्रास आधीपासून असतील.

तज्ज्ञांच्या मते, जर तुम्हाला पायात सूज, वेदना किंवा शिरा बाहेर आलेल्या दिसत असतील, तर दुर्लक्ष करू नका. लवकरात लवकर व्हॅस्क्युलर सर्जनचा सल्ला घ्या.

टीप

ही माहिती केवळ जनजागृतीसाठी आहे. कोणत्याही आरोग्य समस्येसाठी आपल्या डॉक्टरांचा सल्ला घेणं आवश्यक आहे.