Valentine Day Love Letter: 'स्वप्न राहील अपुरे तुजवीण सख्या रे'; मनातील तळमळ बोलू कशी?

प्रिय,...

गेल्या चार पाच दिवसापासून मनात काहूर माजू लागलंय. तुला कसं सांगावं आणि कसं मनातील भावना व्यक्त कराव्यात, हेच कळत नाहीये. व्हॉट्स अप मेसेज करून तुला सांगू शकले असते पण मला वाटतं त्या मेसेजपेक्षा पत्रातील शब्दांनी माझ्या भावना व्यक्त होतील. मी जास्त काही बोलत नाही थेट सांगते, मला तू आवडतोस.. खूप आवडतोस.. तुला पाहिलं नाही ना तर मनात तळमळ होते.

'होतोया कासावीस

तूच तू रात अन दिस

ओंजळीत सांग कसं

तुफान मावल

तुला पाहुन पाहुन याड लागलं'

तुला जेव्हा पहिल्यांदा कॉलेजमध्ये पाहिलं तेव्हा पासूनच माझं हे मन तुझ्यात गुंतलंय. का कोणास ठाऊक मी आपोआप तुझ्याकडे ओढली जाते. तुला पाहण्यास मन माझं झुरतं. तू माझ्याशी अबोला नको पकडूस ना.. तुला माहितीये नकळतपणे मी तुझ्यात खूप गुंतलीय. एकेदिवशी तू माझा हात पकडला होतास तेव्हा अंगात वेगळ्याच प्रकारची ऊर्जा निर्माण झाली होती. हृदयाची धकधक वाढली होती.

आर्त मी तुषार्त मी

तू मृगजळा सारखा

गीत मी संगीत मी

सूर तू रे पारखा

तुला सांगू तू जेव्हा चष्मा लावून येतोस ना तेव्हा काय क्लास दिसतोस तू. मागच्या आठवड्यातही तू चष्मा घालून आला होता त्यावेळी आमच्या घोळक्यात तुझीच चर्चा होती. तू खूप हुशार आहेस . प्रामाणिक आहेस. मला तू खूप आवडतोस. साधेपणा आणि स्वभाव चांगला असला की माणूस आपोआप आवडतो, असं म्हणतात. तुझ्याबाबतीही तेच झालंय. नेहमी मोबाईल मेसेज करण्याची सवय आहे. थोडक्यात काय ते बोलायचं ते बोलत असते. त्यामुळे पत्र लिहितांना शब्द मिळत नाहियेत. पण सांगू का राहुल मी तुझ्यावर खूप प्रेम करते. आय लव्ह यू...

तुझीच मी...

संगिता

औरंगाबाद

मनात दडलेल्या भावना व्यक्त करण्याची हिंमत होत नाहीये?

जवळच्या व्यक्तीला काही मनातलं सांगायचंय, पण भीती वाटतेय. तुमच्या भावनेला आम्ही व्यासपीठ देऊ!

प्रिय व्यक्तीला पत्र लिहा. आम्ही ते प्रसिद्ध करू!

आई-वडील, नवरा-बायको, मित्र किंवा प्रियजनाला आजच पत्र लिहा...

भावना तुमच्या, व्यासपीठ आमचं...

तुमचं पत्र saamtextdigital@gmail.com या मेलवर पाठवा अथवा DM करा! आम्ही ते saamtv.esakal.com संकेतस्थळावर प्रसिद्ध करू.