Heart oxygen deficiency: धाप लागतेय, थकवा जाणवतोय? हृदयाला रक्तपुरवठा न होणाऱ्या ४ लक्षणांकडे इग्नोर करू नका

गेल्या काही काळापासून हार्ट अटॅकच्या घटनांमध्ये वाढ झाल्याचं पाहायला मिळतंय. तरूणांमध्ये हार्ट अटॅक येण्याचं प्रमाण वाढलंय. मुळात आपल्या हृदयाला नीट काम करण्यासाठी सतत ऑक्सिजनयुक्त रक्ताची गरज असते. पण ज्यावेळी रक्तवाहिन्या अरुंद होतात किंवा रक्तपुरवठा कमी होतो तेव्हा हृदयाच्या स्नायूंना योग्य प्रमाणात ऑक्सिजन मिळत नाही.

ज्यावेळी तुमच्या शरीराला पुरेशा प्रमाणात ऑक्सिजनचा पुरवठा होत नाही तेव्हा शरीर काही ना काही लक्षणं देत असतं. ही लक्षणं ओळखून वेळेत उपाय करणं गरजेचं असतं. हृदयाला ऑक्सिजनयुक्त रक्ताचा पुरवठा होत नसल्यास कोणते संकेत मिळतात ते पाहूयात

छातीत दडपण

छातीत दडपण किंवा छाती घट्ट वाटू लागणं ही हृदयाला रक्तपुरवठा होत नसल्याचे संकेत आहे. अनेकदा या वेदना हात, मान, जबडा किंवा पाठीत पसरू शकतात. काही वेळा ही वेदना सौम्य असली तरी ती दुर्लक्ष करण्यासारखी नसते.

लगेच दम लागणं

थोडंसं चाललं, जिने चढलं तरी दम लागणं हेही गंभीर आजाराचे संकेत असू शकतात. काही वेळा झोपेत असताना अचानक श्वास घेता न आल्याने जाग येते. अशावेळी तुमचं हृदय नीट रक्त पंप करू शकत नसल्याने ही परिस्थिती निर्माण होते.

थकवा आणि अशक्तपणा

जर तुम्हाला कोणतंही मेहनतीचं काम न करता तुम्हाला थकल्यासारखं वाटत असेल तर त्याकडे दुर्लक्ष करू नये. यावेळी सतत थकल्यासारखं वाटणं, छोटं काम केल्यानंतरही एनर्जी नसल्यासारखं वाटणं याकडे दुर्लक्षित करू नये. शरीराला पुरेसं ऑक्सिजनयुक्त रक्त न मिळाल्याने स्नायूंमध्ये अशक्तपणा जाणवतो.

हृदयाचे ठोके वाढणं

हृदय जोरात धडधडणं, किंवा आराम करत असताना देखील हृदयाचे ठोके वाढणं हे धोक्याचे संकेत आहेत. हृदयाला योग्य ऑक्सिजन न मिळाल्यामुळे ते जास्त वेगाने काम करण्याचा प्रयत्न करतं. ठोके चुकणं किंवा अचानक वाढणं याकडे चुकूनही दुर्लक्ष करू नका.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.