Shravan Special : ना कांदा, ना लसूण तरीही बनेल हॉटेलसारखी चमचमीत ग्रेव्ही, चव जिभेवर रेंगाळत राहील

श्रावणात आहारामध्ये विशेष काळजी घेतली जाते. कारण श्रावणात अनेक पदार्थ खाल्ले जात नाहीत. त्यात कांदा आणि लसूण यांचा समावेश देखील आहे.श्रावण पावसाळ्यात येत असल्यामुळे कांदा आणि लसूण खाणे टाळे जाते. कारण पावसाळ्यात पचनक्रिया मंदावते आणि या वातावरणात हे पदार्थ वातूळ असतात. कांदा, लसूण श्रावणात खाणे बंद असल्यामुळे अनेक महिलांना भाजी बनवताना ग्रेव्ही कशी तयार करायची हा प्रश्न पडतो. कारण कोणत्याही भाजी बनवण्यासाठी ग्रेव्ही खूप महत्त्वाची आहे. ग्रेव्ही शिवाय कोणताही पदार्थ विशेषतः भाजी स्वादिष्ट होत नाहीत.

कांदा-लसूण न घालता कशी करायची ग्रेव्ही?

श्रावणात कांदा, लसूण न घालता झटपट ग्रेव्ही करा आणि भाजीची चव वाढवा.

साहित्य

• टोमॅटो

• वेलची

• दालचिनी

• काळी मिरी

• लवंग

• मीठ

• शिमला मिरची

• गाजराचे काप

• कोथिंबीर

• काजू

• आलं

• हिरवी मिरची

• काश्मिरी लाल तिखट

• धने पूड

• हळद

• तेल

कृती

कांदा-लसूण न घालता ग्रेव्ही बनवण्यासाठी सर्वप्रथम टोमॅटो, शिमला मिरची कापून घ्या. त्यानंतर गॅसवर कुकर गरम करायला ठेवा आणि त्यात टोमॅटो, शिमला मिरची, गाजराचे काप हे पदार्थ टाका. दालचिनी, काळी मिरी, लवंग, हिरवी मिरची, आलं, काश्मिरी लाल तिखट, धने पूड, हळद इत्यादी मसाले टाकून मिश्रण एकजीव करून घ्या. आता गॅस मंद आचेवर ठेवून कुकरच्या ४ शिट्टया काढून घ्या. कुकर थोडा थंड झाल्यावर मिश्रणातील तमालपत्र काढून बाकी सर्व मिश्रण मिक्सरला छान वाटून घ्या. एका पॅनमध्ये तेल गरम करून त्यात जिरेपूड, काळी मिरी टाकून फोडणी करा. त्यानंतर यात मिक्सरला पेस्ट केलेली ग्रेव्ही टाकून ९ ते १० मिनिटे मंद आचेवर शिजवून घ्या. अशाप्रकारे कांदा, लसूण न वापरता झणझणीत ग्रेव्ही तयार झाली. कोणत्याही मसालेदार भाजीत घालून याची चव ‌वाढवा. श्रावणात ही ग्रेव्ही भाज्यांची चव वाढवेल.