Navratri 4th Day: नवरात्रीच्या चौथ्या दिवशी कूष्मांडा देवीची पूजा कशी करावी? जाणून घ्या पद्धत

२२ सप्टेंबरपासून शारदीय नवरात्रोत्सवाला सुरूवात झाली आहे. नऊ दिवस दुर्गा देवीच्या नऊ रूपांची पूजा करतात. आज नवरात्रीचा चौथा दिवस आहे. नवरात्रीच्या चौथ्या दिवशी कूष्मांडा देवीची पूजा केली जाते. असे मानले जाते कूष्मांडा देवीची पूजा केल्याने आरोग्याच्या समस्या आणि जीवनातील दु:ख दूर होतात धन, किर्ती आणि उत्पन्नात वाढ होते.

दुर्गादेवीच्या चौथ्या दिवशी कूष्मांडा रूपाची पूजा कूष्मांडा देवीला आठ हात आहेत. दुर्गा देवीचे चौथे स्वरूप असलेली कूष्मांडा देवी अष्टभुजा आहे. देवीने बाण, चक्र, गदा, अमृत कलश, कमळ, कमंडलु, सिद्धी आणि निधींची माळ भुजांमध्ये धारण केले आहे. कूष्मांडा देवीचे वाहन सिंह आहे. कूष्मांडा देवीची पूजा घरात केल्याने घरात सुख समृद्धी येते. कूष्मांडा माता सूर्यमालेच्या आतील जगात वास करते. मातेच्या शरीराचे तेज देखील सूर्यासारखे आहे तिचे तेज आणि प्रकाश सर्व दिशांना प्रकाशित करतात.

कूष्मांडा देवीची पूजा-

1) सकाळी लवकर उठून स्नान केल्यानंतर कूष्मांडा देवीची पूजा करा.

2) देवीच्या पूजेत लाल रंगाची फुले, जास्वंद आणि गुलाबाचे फूल आवर्जुन अर्पण करा.

3) कूष्मांडा देवीची पूजा केल्यानंतर देवीला गोड नैवेद्य दाखवा.

4) देवीचे पूजन करताना हिरव्या रंगाचे वस्त्र परिधान करणे शुभ मानले जाते.

5) कूष्मांडा देवीची पूजा झाल्यानंतर ओम देवी कूष्माण्डायै नम: या देवी सर्वभूतेषु माँ कूष्मांडा रूपेण संस्थिता| या मंत्राचा जप करा.