Prostate Cancer Signs: आतड्याला त्रास होतोय, वेळीच तपासणी करा; तज्ज्ञांनी सांगितली प्रोस्टेट कॅन्सरची लक्षणं अन् महत्त्वाचा सल्ला

सध्याच्या बदलत्या जीवनशैलीचा परिणाम थेट आरोग्यावर गंभीर प्रकारे जाणवू लागला आहे. ब्रिटनमधील ५४ वर्षाचे जेसन यो (Jason Yeo) या व्यक्तीला कोणतीही लक्षणं नसताना प्रोस्टेट कॅन्सरच्या आजाराला सामोरं जावं लागलं. जेसन हे डेवॉन येथील ट्रॅव्हलिंग सेल्समन असून ते नेहमी फीट, निरोगी, खेळाडूवृत्तीचे, सगळ्या कामात सक्रीय राहणारे व्यक्ती होते. मात्र त्याच्या गट फिलिंगवर म्हणजेच मनातल्या आवाजावर विश्वास ठेवल्यामुळे त्याचं आयुष्य वाचलं.

प्रोस्टेट कॅन्सर म्हणजे काय?

प्रोस्टेट हा पुरुषांच्या शरीरातील लहान ग्रंथी आहे जी मूत्राशयाखाली आणि गुदाशयासमोर असते. ही ग्रंथी वीर्यातील द्रव तयार करते. जे शुक्राणूंना आरोग्यदायी ठेवतं. हा कॅन्सर गंभीर असला तरी सुरुवातीच्या टप्प्यात निदान झाल्यास पूर्णपणे बरा होऊ शकतो. तज्ञांच्या मते, दर १०० पुरुषांपैकी १३ जणांना आयुष्यात कधी ना कधी प्रोस्टेट कॅन्सर होऊ शकतो.

डॉक्टरांनी सुरुवातीला दिला वेट अँड वॉच सल्ला

जेसन यांनी तपासणीदरम्यान नियमित आरोग्य तपासणीचा भाग म्हणून PSA (Prostate-Specific Antigen) टेस्ट केली होती. MRI आणि बायोप्सी चाचणीनंतर निदान झालं की कॅन्सर अधिक गंभीर स्वरूपाचा आहे. त्यानंतर त्यांनी Cryotherapy हे विशेष उपचार घेतले. जे संपूर्ण यूकेमध्ये सर्वत्र उपलब्ध नाहीत. जेसन यांनी सांगितलं, ''माझ्या पत्नीने हेल्थ चेकअपसाठी व्हाउचर दिलं होतं. त्या तपासणीत एक छोटा रेड सिग्नल मिळाला आणि आम्ही पुढे कारवाई केली. मी वैद्यकीय तज्ञ नाही, पण मन सांगत होतं की काहीतरी चुकतंय आणि माझ्या पत्नी व वडिलांनी मला हार मानू दिली नाही.

प्रोस्टेट कॅन्सरची सुरुवातीची लक्षणं कोणती?

सुरुवातीला कोणतीही लक्षणं दिसत नाहीत, पण पुढील टप्प्यावर खालील बदल जाणवू शकतात:

1 वारंवार लघवी लागणे, विशेषतः रात्री सतत लघवी होणे.

2 लघवीचा प्रवाह कमी होणे किंवा मध्येच थांबणे.

3 लघवी करताना जळजळ किंवा वेदना होणे.

4 मूत्राशयावर नियंत्रण कमी होणे.

5 वीर्यात किंवा लघवीत रक्त दिसणे.

6 संभोगादरम्यान वेदना किंवा इरेक्टाइल डिसफंक्शन होणे.

7 पाठी, कंबरेत किंवा छातीत वेदना होणे.