आपल्या शरीरातील सर्वात महत्त्वाचा अवयव म्हणजे हृदय. हृदय सतत काम करत संपूर्ण शरीरात रक्त आणि ऑक्सिजन पोहोचवत असतं. त्यामुळे हृदयाच्या कामात काही बिघाड झाला तर त्याचा परिणाम शरीराच्या वेगवेगळ्या भागांवर दिसून येऊ शकतो. विशेष म्हणजे हृदयाशी संबंधित काही समस्या चेहऱ्यावरही दिसू शकतात.
अनेकदा आपण चेहऱ्यावर दिसणाऱ्या अशा बदलांकडे दुर्लक्ष करतो. मात्र काही लक्षणं वारंवार दिसत असतील किंवा अचानक जाणवली असतील तर ती हृदयाच्या आरोग्याशी संबंधित असू शकतात. हार्ट अटॅकची चेहऱ्यावर दिसणारी कोणती लक्षणं दुर्लक्षित करू नयेत, ते जाणून घेऊया.
चेहऱ्याचा रंग अचानक फिका पडणं किंवा निळसर दिसू लागणं हे सामान्य लक्षण नाही. शरीराला पुरेसा ऑक्सिजन मिळत नसल्यास त्वचेचा रंग बदलू शकतो. विशेषतः ओठ आणि डोळ्यांच्या आसपासची त्वचा फिकी किंवा निळसर दिसू शकते. या स्थितीला वैद्यकीय भाषेत सायनोसिस (Cyanosis) म्हणतात. शरीरात ऑक्सिजनची कमतरता दर्शवणारं हे गंभीर लक्षण असू शकतं. त्यामुळे असा बदल अचानक जाणवल्यास त्याकडे दुर्लक्ष न करता तातडीने डॉक्टरांचा सल्ला घेणं गरजेचं आहे.
हवामान सामान्य असतानाही किंवा कोणताही विशेष त्रास नसताना चेहऱ्यावर अचानक थंड घाम फुटत असेल तर सावध होण्याची गरज आहे. हृदयाशी संबंधित समस्यांमध्ये, विशेषतः हार्ट अटॅकच्या आधी, शरीरावर ताण येणं आणि ऑक्सिजनचा पुरवठा कमी होणे यामुळे थंड घाम येऊ शकतो. त्यामुळे चेहऱ्यावर अचानक थंड घाम येण्यासोबत अस्वस्थपणा किंवा इतर त्रास जाणवत असेल तर हे शरीराकडून मिळणारं इशाराचं चिन्ह असू शकतं.
चेहऱ्यावर कोणतंही स्पष्ट कारण नसताना अचानक सूज येत असेल तर त्याकडे दुर्लक्ष करू नका. हृदयाला शरीरभर रक्त व्यवस्थित पंप करता न आल्यास रक्ताभिसरणावर परिणाम होऊ शकतो. त्यामुळे शरीरात द्रव साचण्याची शक्यता असते आणि त्याचा परिणाम चेहऱ्यावर सूज येण्यातही दिसू शकतो.
चेहऱ्यावर सूज येण्यामागे इतरही अनेक कारणं असू शकतात. पण सूज अचानक आली असेल किंवा वारंवार होत असेल तर डॉक्टरांकडून तपासणी करून घेणं योग्य ठरेल.
चेहरा कायम थकलेला किंवा निस्तेज दिसत असेल आणि त्यासोबत संपूर्ण शरीरात अशक्तपणा जाणवत असेल तर त्याचं कारण फक्त थकवा आहे असं समजू नका. हृदय शरीराच्या प्रत्येक भागाला पुरेसं रक्त आणि ऑक्सिजन पोहोचवू शकत नसेल तर थकवा आणि कमजोरी जाणवू शकते. त्यामुळे चेहऱ्यावर सतत थकवा दिसत असेल आणि दैनंदिन काम करतानाही नेहमीपेक्षा जास्त अशक्तपणा जाणवत असेल, तर हृदयाच्या आरोग्याची तपासणी करून घेणं महत्त्वाचं आहे.
हार्ट अटॅक म्हटलं की अनेकांच्या डोळ्यासमोर सर्वप्रथम छातीत होणाऱ्या वेदना येतात. मात्र प्रत्येक वेळी हृदयविकाराचा झटका फक्त छातीत दुखण्यानेच जाणवतो असं नाही.
काही वेळा जबडा, हनुवटी, मान किंवा अगदी कानाच्या आसपासही वेदना जाणवू शकतात. हा त्रास अचानक सुरू झाला आणि शारीरिक हालचाल किंवा व्यायाम केल्यानंतर तो वाढत असेल, तर त्याकडे गांभीर्याने पाहणं गरजेचं आहे. अशा वेदनांसोबत छातीत दुखणं, धाप लागणं, घाम येणं किंवा अस्वस्थ वाटणं अशी लक्षणंही असतील तर वेळ न घालवता तातडीने वैद्यकीय मदत घ्यावी.
टीप : ही माहिती सर्वसाधारण माहितीसाठी आहे. कोणताही वैद्यकीय सल्ला घेण्यापूर्वी आपल्या डॉक्टरांचा सल्ला घेणे आवश्यक आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.