Heart Attack Signs: हार्ट अटॅक येण्याआधी महिनाभर आधीच समजते, या लक्षणाकडे दुर्लक्ष करणं महागात पडेल

जेव्हा आपण हार्ट अटॅकबद्दल विचार करतो, तेव्हा आपल्या डोळ्यांसमोर अचानक छातीत वेदना, दाब जाणवणं किंवा श्वास घेताना छातीत त्रास होणं ही सामान्य लक्षणं डोळ्यासमोर उभी राहतात. पण खरा इशारा जर काही दिवस आधीच शरीर देत असेल, आणि आपण तो दुर्लक्ष करत असू तर? यासंबंधीत पुढे आपण सविस्तर जाणून घेऊ.

ऑर्थोपेडिक आणि स्पोर्ट्स सर्जन डॉ. ओबैदूर रहमान यांनी अलीकडेच इंस्टाग्रामवर एक महत्त्वाचा इशारा दिला आहे. त्यानुसार, हार्ट अटॅक येण्याआधी जवळपास प्रत्येक रुग्णाला एक सामान्य पण दुर्लक्षित लक्षण जाणवतं. त्यातील तब्बल ९२ टक्के लोक ते दुर्लक्ष करतात. हे लक्षण ना वेदना असतं, ना दडपण तर ते असतं झोपल्यावर श्वास घेण्यास त्रास होणं. ज्याला वैद्यकीय भाषेत Orthopnea म्हणतात.

अनेकांना हा त्रास आम्लपित्त, ताणतणाव किंवा टेंशनमुळे होतो असं वाटतं, पण खरंतर हा शरीराचा गंभीर इशारा असतो. हृदय कमजोर झालं की रक्त फुफ्फुसांकडे साचतं, आणि जेव्हा आपण आडवं झोपतो तेव्हा गुरुत्वाकर्षणाची मदत कमी मिळते. त्यामुळे श्वास घेणं अवघड होतं.

ऑर्थोप्निया हा फक्त त्रास नाही, तर हृदयविकाराचा थेट इशारा आहे. आडवं झोपल्यावर शरीराच्या खालच्या भागातून जास्त रक्त हृदयाकडे परत येतं. निरोगी हृदय हे सहज पंप करतं, पण कमजोर किंवा कठीण झालेलं हृदय जसं हार्ट फेल्युअर किंवा कोरोनरी आर्टरी डिसीजमध्ये होतं. त्या रक्ताचा ताण सहन करू शकत नाही. परिणामी, फुफ्फुसांमध्ये द्रव साचतो आणि श्वास घेणं कठीण होतं.

जर तुम्हीही झोपताना वारंवार उशी वाढवत असाल, आडवं होताच श्वास गुदमरल्यासारखं होत असेल, किंवा रात्री अचानक श्वास रोखल्यासारखं वाटून जाग येत असेल तर हे तणाव नाही तर हे शरीराचं SOS सिग्नल आहे. तुमचं हृदय स्वतःच्या द्रवात बुडतंय, अशी ती अवस्था असते.