Liver Damage Tea: गरमागरम चहाने दिवसाची सुरुवात करताय? लिव्हरवर होईल गंभीर परिणाम, संशोधनातून माहिती समोर

BMC Nutrition या आंतरराष्ट्रीय जर्नलमध्ये प्रकाशित केलेल्या रिसर्चमध्ये चहा पिण्याची पद्धत आणि प्रमाणानुसार लिव्हर एन्झाइम्समध्ये होणाऱ्या बदलांचा अभ्यास केला गेला. या संशोधनात काही चांगले परिणाम आढळले असले तरी अतिरेकी किंवा चुकीच्या पद्धतीने घेतलेल्या चहामुळे उलट परिणाम होऊ शकतात, असा इशारा देण्यात आला आहे.

चहातील पॉलीफिनॉल्स (polyphenols) आणि कॅटेचिन्स (catechins) या घटकांमध्ये अँटीऑक्सिडंट आणि अँटी-इन्फ्लेमेटरी गुणधर्म मोठ्या प्रमाणात असतात. हे घटक लिव्हरच्या पेशींना ऑक्सिडेटिव्ह स्ट्रेसपासून वाचवतात आणि शरीरातील एन्झाइम्सची कार्यक्षमता टिकवण्याचं काम करतात. दररोज प्रमाणात म्हणजे दोन ते चार कप चहा घेणाऱ्यांमध्ये लिव्हरचे एन्झाइम्स ALT (Alanine Aminotransferase) आणि AST (Aspartate Aminotransferase) हे संतुलित पातळीवर राहतात.

या अभ्यासात 6,000 हून जास्त ३५ वयोगटाच्या व्यक्तींचा सहभाग होता. ज्यांनी दररोज 2 ते 4 कप चहा घेतला, त्यांचे लिव्हरचे कार्य व्यवस्थित काम करताना आढळलं. तर जे लोक 5 पेक्षा जास्त कप घेत होते किंवा अजिबात चहा घेत नव्हते, त्यांच्यात लिव्हर एन्झाइम्सचे प्रमाण असंतुलित दिसले. विशेष म्हणजे, चहा जेवणासोबत घेतल्यास लिव्हरवरील ताण कमी होतो, कारण अन्नामुळे कॅफिन आणि कॅटेचिन्सचे शोषण हळूहळू होते.

याउलट, रिकाम्या पोटी गडद चहा घेणाऱ्यांमध्ये लिव्हर एन्झाइम्सची पातळी वाढलेली दिसून आली. संशोधकांच्या मते, यामुळे अचानक कॅफिन आणि इतर सक्रिय घटकांचे प्रमाण शरीरात वाढते आणि लिव्हरवर तात्पुरता ताण येतो. त्यामुळे जमेल तितका चहा टाळणे हा शरीरासाठी घेतलेला मोठा निर्णय असू शकतो.