Heart Attack In Kids: लहान मुलांमध्ये ही ५ लक्षणं दिसली व्हा सावध; हार्ट अटॅकचा असतो धोका

आजकाल लहान मुलांमध्येही हृदयाशी संबंधित आजार झपाट्याने वाढताना दिसतायत. पूर्वी फक्त मोठ्या वयाच्या लोकांमध्ये दिसणारा हार्ट अटॅक आता मुलांमध्येही आढळू लागलाय. डॉक्टरांच्या मते, काही लक्षणांकडे दुर्लक्ष केल्यास परिस्थिती गंभीर होऊ शकते. त्यामुळे मुलांमध्ये दिसणाऱ्या काही खास संकेतांकडे वेळीच लक्ष देणं अत्यंत महत्त्वाचं ठरतं.

छातीत दुखणं

मुलाला अचानक छातीत तीव्र वेदना होणं किंवा छातीवर दाब येत असल्यासारखं वाटणं हे हार्ट अटॅकचं सुरुवातीचं लक्षण असू शकतं. अनेकदा मुलं 'छाती दुखतेय' अशी तक्रार करतात. पण पालक ते सामान्य समजून दुर्लक्ष करतात. मात्र अशी समस्या वारंवार होत असेल तर त्वरित डॉक्टरांचा सल्ला घेणं गरजेचं आहे.

श्वास घेण्यास त्रास

हार्ट नीट काम करत नसेल तर शरीराला पुरेसा ऑक्सिजन मिळत नाही. त्यामुळे मुलाला धाप लागणं, श्वास घेण्यास त्रास होणं किंवा सतत दम लागल्यासारखं वाटू शकतं. काही वेळा मुलं बोलतानाही किंवा थोडं चालल्यानंतरही खूप थकलेली दिसतात. हे लक्षण धोक्याचं ठरू शकतं.

कारण नसताना जास्त घाम येणं

उन्हाळा किंवा खेळल्यामुळे घाम येणं सामान्य आहे. पण कोणतंही कारण नसताना सतत घाम येत असेल तर त्याकडे दुर्लक्ष करू नये. विशेषतः रात्री झोपेत खूप घाम येत असेल तर हे हृदयाच्या समस्येचं संकेत असू शकतं. शरीरावर अचानक थंड घाम येणं हे देखील गंभीर लक्षण मानलं जातं.

जबडा आणि चेहऱ्यात वेदना

दातांच्या समस्येमुळेच जबड्यात दुखतं असं नाही. काही वेळा हृदयाशी संबंधित त्रासामुळेही चेहरा किंवा जबड्यात वेदना जाणवू शकतात. मुलाला चेहऱ्यावर टोचल्यासारखं वाटणं किंवा जबडा दुखत असल्याची तक्रार असेल तर त्यामागे हृदयविकाराचं कारण असण्याची शक्यता नाकारता येत नाही.

सतत थकवा जाणवणं

मुलं साधारणपणे उत्साही आणि खेळकर असतात. पण एखादं मूल सतत थकल्यासारखं दिसत असेल, पुरेशी झोप घेतल्यानंतरही अशक्त वाटत असेल किंवा खेळण्यात रस दाखवत नसेल, तर हेही धोक्याचं लक्षण असू शकतं. हृदय व्यवस्थित काम करत नसल्यास शरीराला पुरेशी ऊर्जा मिळत नाही आणि त्यामुळे थकवा वाढतो.

टीप : ही माहिती वाचक-प्रेक्षकांपर्यंत पोहचवण्याचा प्रयत्न आहे. कुठलाही दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.