Badshah Wedding: रॅपर बादशाहने गुपचूप घरच्या घरी केलं दुसरं लग्न?; कोण आहे बायको?

Badshah Wedding: प्रसिद्ध रॅपर आणि गायक बादशाह त्याच्या गाण्यामुळे नेहमी चर्चेत असतो पण आता बादशाह आपल्या वैयक्तिक आयुष्यामुळे चर्चेत आला आहे. सोशल मीडियावर सध्या त्याचे आणि अभिनेत्री ईशा रिखीचे काही फोटो आणि व्हिडिओ वेगाने व्हायरल होत असून, या दोघांनी गुपचूप लग्न केल्याची चर्चा रंगली आहे. या फोटोंमुळे चाहत्यांमध्ये मोठी उत्सुकता निर्माण झाली आहे.

व्हायरल आलेल्या फोटोंमध्ये बादशाह आणि ईशा पारंपरिक विवाहच्य पोशाखात दिसत आहेत. ईशाने लाल रंगाच्या सलवार सूट परिधान केला आहे. या लूकमध्ये ती अतिशय सुंदर दिसत असून, बादशाहने हिरव्या रंगाचा कुर्ता परिधान केला आहे. दोघांनी गळ्यात वरमाला घातलेली असून दोघेही लग्न विधी करताना दिसत आहेत.

विशेष म्हणजे, हे फोटो बादशाह किंवा ईशा यांच्या सोशल मीडिया अकाउंटवरून शेअर केले नाहीत. तर, ईशाची आई आणि बादशाहची सासू पूनम रिखी यांनी आपल्या इन्स्टाग्रामवर हे फोटो शेअर केल्याचे समोर आले आहे. त्यांनी या जोडप्याला आशीर्वाद देत “देव तुम्हाला सुखी ठेवो” असे कॅप्शनमध्ये लिहिले आहे.

हे बादशाहाचे पहिले लग्न नसून त्याचे यापूर्वी लग्न झाले होते. बादशाहचे खरे नाव आदित्य प्रतीक सिंग सिसोदिया आहे. त्याने यापूर्वी जस्मिन मसिह हिच्यासोबत लग्न केले होते. २०१२ मध्ये लग्न झाल्यानंतर २०१७ मध्ये ते वेगळे झाले आणि २०२० मध्ये घटस्फोट झाला. त्यांना जेसेमी मसिह सिंग नावाची एक मुलगी आहे.