Famous Actress : गुडन्यूज! प्रसिद्ध अभिनेत्री झाली आई, गोंडस बाळाला दिला जन्म; नाव काय?

मनोरंजन विश्वातून आनंदाची बातमी समोर आली आहे. 'सनम तेरी कसम' फेम अभिनेत्री मावरा होकेन (Mawra Hocane) आई झाली आहे. मावरा आणि तिचा नवरा अमीर गिलानी यांनी ही सुखद बातमी चाहत्यांना दिली आहे. सध्या सोशल मीडियावर या जोडप्याची चर्चा रंगली आहे. आपल्या सोशल मिडिया अकाउंटवर एक खास पोस्ट शेअर करून अभिनेत्रीने ही आनंदाची बातमी जाहीर केली आहे.

अभिनेत्री मावरा होकेनने गोंडस बाळाला जन्म दिला आहे. ज्याचे नाव दोघांनी 'सय्यद अझमर हुसेन कमाल गिलानी' असे ठेवले आहे. अभिनेत्रीने रुग्णालयातील एक व्हिडिओ पोस्ट केला, ज्यामध्ये त्यांचा नवजात मुलगा आणि पती अमीर यांची झलक पाहायला मिळते. या व्हिडिओमध्ये अमीर आपल्या मुलाच्या कानात अजान वाचताना दिसत आहेत.

अभिनेत्रीने आपल्या मुलाच्या नावाचा अर्थही सांगितला. तिच्या पोस्टनुसार, 'अझमर'चा अर्थ 'सिंह' असा होतो. तिने आपल्या मुलाचे वर्णन करताना त्याला "आमच्या जंगलाचा राजा, आमचा अभिमान आणि आमचा सर्वात मौल्यवान खजिना" असे म्हटले आहे. सोशल मीडियावर ही बातमी जाहीर होताच, या जोडप्यावर अभिनंदनाचा , शुभेच्छांचा वर्षाव चाहते आणि कलाकार मंडळी करत आहेत.

मावराने फेब्रुवारी २०२५ मध्ये अमीरसोबत लग्नगाठ बांधली होती. अमीर गिलानीही एक अभिनेता आहे. मावराने २०१६ मध्ये 'सनम तेरी कसम' या रोमँटिक ड्रामा चित्रपटाद्वारे बॉलिवूडमध्ये पदार्पण केले होते. या चित्रपटाला प्रेक्षकांनी भरपूर प्रेम दिले.