Prasad Oak: रील्स म्हणजे अभिनय नाही...; प्रसाद ओकच्या वक्तव्याने रंगली चर्चा, सोशल मीडियावर नवा वाद पेटणार

Prasad Oak Viral Statement: ‘महाराष्ट्राची हास्यजत्रा’ या लोकप्रिय कार्यक्रमात अभिनेता व दिग्दर्शक प्रसाद ओक यांनी सोशल मीडियावरच्या रील्सबाबत एक ठाम मत मांडले आहे. त्यांनी थेट सांगितले, “रील्स म्हणजे अभिनय नाही.” त्यांच्या या विधानाची सध्या जोरदार चर्चा होत असून ते सोशल मीडियावर प्रचंड व्हायरल झाले आहे.

कार्यक्रमादरम्यान प्रसाद ओक यांनी मंचावरील सादरीकरण व लिखाणाचं कौतुक करताना स्पष्ट केलं की, अभिनय म्हणजे मेहनत, सराव आणि प्रेक्षकांसमोरची खरी परीक्षा. “रील्सवर लाखो व्ह्यूज मिळाले तरी त्या ठिकाणी प्रेक्षकांची थेट उपस्थिती नसते. रंगभूमीवर टाळ्या, शिट्ट्या आणि हशा यामध्येच अभिनयाची खरी कसोटी दडलेली आहे,” असं ते म्हणाले.

त्यांच्या या वक्तव्यानंतर सोशल मीडियावर मोठा वादंग उठला आहे. अनेकांनी त्यांच्या मताला पाठिंबा देत लिहिलं की आजच्या तरुणांना खरी कला आणि फक्त प्रसिद्धी यातला फरक समजणे आवश्यक आहे. काहींचं मात्र म्हणणं आहे की, रील्सही एक प्रकारचं कलात्मक व्यासपीठ आहे, पण ते पारंपरिक अभिनयाची जागा घेऊ शकत नाही.

या विधानामुळे ‘खरा अभिनय विरुद्ध सोशल मीडियावरील लोकप्रियता’ या चर्चेला आता नवं वळण मिळालं आहे. प्रसाद ओक यांचं म्हणणं हे आजच्या पिढीला अभिनयाचं खरं तत्त्व समजून घेण्यासाठी एक महत्त्वाचा इशारा मानला जात आहे.