Sharayu Sonawane Engagement: ‘पिंकीचा विजय असो’ फेम अभिनेत्रीने गुपचूप उरकला साखरपुडा, फोटो शेअर करत चाहत्यांना दिला सुखद धक्का

Sharayu Sonawane And Jayant Lade Engagement:

‘स्टार प्रवाह’ वाहिनीवरील लोकप्रिय मालिका 'पिंकीचा विजय असो' ला प्रेक्षकांकडून खूप चांगला प्रतिसाद मिळत आहे. ही मालिका सध्या प्रेक्षकांच्या पसंतीस उतरत असून या मालिकेतील पिंकीची भूमिका साकारणारी शरयू सोनावणे प्रेक्षकांना खूपच आवडली. काही दिवसांपूर्वी पिंकीने ही मालिका सोडून चाहत्यांना मोठा धक्का दिला होता. त्यानंतर आता तिने पुन्हा एकदा चाहत्यांना धक्का दिला पण हा धक्का मात्र सुखद आहे. यामागचे कारण आहे ते म्हणजे शरयू सोनावणेने गुपचूप साखरपुडा उरकला.

गणेश चतुर्थीच्या शुभ मुहूर्तावर शरयूने साखरपुडा केला आहे. अभिनेत्रीने साखरपुड्यातील रोमँटीक फोटो शेअर करत चाहत्यांना साखरपुडा केल्याची माहिती दिली. हा फोटो पाहून तिचे चाहते आश्चर्यचकीत झाले आहेत. शरयूच्या या फोटोला चाहत्यांकडून खूप चांगली पसंती मिळत आहे. या फोटोंवर कमेंट्स करत चाहत्यांनी शुभेच्छांचा वर्षाव केला आहे.

शरयूने साखरपुड्याचे रोमँटिक फोटो शेअर करत कॅप्शनमध्ये असे लिहिले आहे की, 'आयुष्यभरासाठी एका व्यक्तीला त्रास देण्याचं मी ठरवलं आहे. हॅपी अ‍ॅण्ड एंगेज…गणपती बाप्पा मोरया.' शरयूच्या या फोटोंवर कमेंट्स करत तिच्या चाहत्यांनी दोघांना देखील शुभेच्छा दिल्या आहेत. तिचा हा फोटो सोशल मीडियावर व्हायरल होत आहे.

शरयू या फोटोमध्ये खूपच गोड दिसत आहे. तिने साखरपुड्यामध्ये लेहंगा परिधान केला होता. या फोटोमध्ये ती तिच्या पतीसोबत रोमँटिक अंदाजमध्ये दिसत आहे. शरयूच्या होणाऱ्या नवऱ्याचे नाव जयंत लाडे आहे. जयंत हा फिल्ममेकर आणि निर्माता आहे. दरम्यान, शरयू सोनावणे ही पिंकीचा विजय असो या मालिकेतून घराघरामध्ये पोहचली. या मालिकेतील शरयूची पिंकी ही भूमिका प्रेक्षकांना प्रचंड आवडली. पण काही दिवसांपूर्वी तिने या मालिकेला रामराम ठोकला. आता या मालिकेत पिंकीची भूमिका अभिनेत्री आरती मोरे साकारत आहे.