Mahesh Manjrekar On Baipan Bhaari Deva: ‘बाईपण भारी देवा’ पाहिल्यानंतर महेश मांजरेकरांनी केले कौतुक, म्हणाले...

Mahesh Manjrekar Comment On Baipan Bhaari Deva: केदार शिंदे दिग्दर्शित‘बाईपण भारी देवा’ हा चित्रपट गेल्या काही दिवसांपासून सोशल मीडियावर चर्चेत आहे. सध्या हा चित्रपट अनेक सेलिब्रिटी पाहत असून ते चित्रपटाबद्दल आपली प्रतिक्रिया देत आहे. ‘बाईपण भारी देवा’ पाहिल्यानंतर अभिनेता- दिग्दर्शक महेश मांजरेकर यांनी प्रतिक्रिया दिली आहे. महेश मांजरेकरांनी सोशल मीडियाच्या माध्यमातून दोन व्हिडिओ शेअर करत चित्रपटाबद्दल त्यांची प्रतिक्रिया दिली आहे.

सोशल मीडियावर प्रतिक्रिया देत महेश मांजरेकर म्हणतात, “‘बाईपण भारी देवा’ चित्रपट प्रदर्शित झाला असून मी हा चित्रपट पाहिला आहे. खूपच सुंदर चित्रपट आहे. चित्रपट प्रदर्शित होताच तुम्ही तो डोक्यावर घेतलाय. पण अजून तो डोक्यावर घेणं गरजेचे आहे, इतका सुंदर हा चित्रपट आहे. सर्व काम बाजूला ठेवा आणि जाऊन हा चित्रपट पाहा.” सोबतच यावेळी महेश मांजरेकरांनी दिग्दर्शक आणि निर्मात्यांवर अभिनंदनाचा वर्षाव केला.”

सोबतच पुढे महेश मांजरेकर म्हणतात, “तुम्हाला वाटतं असेल ‘बाईपण भारी देवा’ हा चित्रपट म्हणजे फक्त बायकांचा चित्रपट आहे, पण तसं नाही. हा चित्रपट पुरुषांनी ही पाहणं फार गरजेचे आहे. हा चित्रपट पाहून तुम्ही तुमच्या बायकोला, मैत्रिणीला, बहिणीला जास्त समजून घेऊ शकाल. तुम्ही जरा समजुतदारपणे वागू शकाल.”, असे महेश मांजरेकर म्हणाले. सोबतच यावेळी मांजरेकरांनी मराठी प्रेक्षकांचेही आभार मानले. आभार मानताना महेश मांजरेकर म्हणतात, “मराठी प्रेक्षक जर चांगला आशय असेल तर आवर्जुन मराठी सिनेमा पाहायला येतात.”

तर अभिनेते महेश मांजरेकरांनी आणखी एक व्हिडीओ शेअर केला आहे, त्या शेअर केलेल्या व्हिडीओत ते म्हणतात, “धन्यवाद.‘बाईपण भारी देवा’ या चित्रपटात सहा बायकांनी अक्षरश: धुमाकूळ घातलाय. वंदना, सुचित्रा, रोहिणी, शिल्पा, सुकन्या, दिपा या सहा जणी फारच योग्य वाटतात. तुम्हाला प्रेक्षक नक्कीच डोक्यावर घेऊन नाचणार आहेत,यामध्ये काहीच शंका नाही. तसेच मला या चित्रपटाची लेखिका वैशाली नाईक,हिचे विशेष आभार मानायचे. तुझे या सिनेसृष्टीत स्वागत. तुझ्यासारख्या लेखकांची सिनेसृष्टीला गरज आहे. त्यामुळे जाऊन पटकन बघा ‘बाईपण भारी देवा’”, असेही आवाहन महेश मांजरेकरांनी केले. एकूणच बाईपण भारी देवाचं अनेक ठिकाणी कौतुक होतंय. महिलावर्ग समूहाने सिनेमा पाहायला जात आहेत.