Mahesh Kothare: महेश कोठारे म्हणाले मी मोदी भक्त; संजय राऊतांनी उडवली खिल्ली, म्हणाले - 'तात्या विंचू रात्री येऊन...'

Sanjay Raut on Mahesh Kothare: मराठी सिनेसृष्टीतील अभिनेते, दिग्दर्शक आणि निर्माता महेश कोठारे यांनी एका कार्यक्रमात सांगितले की ते भाजपाचे आणि पंतप्रधान नरेंद्र मोदीचे भक्त आहेत. त्यांनी म्हटले,“मी मोदी भक्त आहे, मुंबईत कमळ फुलवायचे आहे आणि माझं हे मत स्पष्ट आहे.”

या त्यांच्या वक्तव्यावर प्रतिक्रिया देताना शिवसेना (उबाठा)चे खासदार संजय राऊत यांनी जोरदार टीका केली. राऊत म्हणाले, “ महेश कोठारे नक्की मराठीच आहेत ना? मला शंका वाटते. आपण कलाकार आहात. तुमचे सिनेमे फक्त भाजपच्या लोकांनी पाहिले आहेत का? अशा वक्तव्यांनी परिणाम होऊ शकतो. तात्या विंचू रात्री येऊन तुमचा गळा दाबेल.”

संजय राऊत यांनी कोठारेंच्या विधानाकडे राजकीय संदर्भातून लक्ष वेधले. त्यांनी सांगितले की, महेश कोठारेंचे हे वक्तव्य फक्त एकवेळचे नाही, तर याचा परिणाम मुंबई राजकारणात दिसेल. त्यांच्या या शब्दांमुळे सोशल मीडियावर आणि राजकीय वर्तुळात मोठी चर्चा सुरू झाली आहे.

महेश कोठारे हे मराठी सिनेसृष्टीतील एक महत्वाचे नाव असून, ‘थरथराट’, ‘झपाटलेला’ , 'धूमधडाका' यांसारख्या चित्रपटांमधून त्यांनी आपली छाप पाडली आहे. आता त्यांच्या राजकीय वक्तव्यामुळे त्यांचे चाहते आणि समीक्षक दोघेही आश्चर्यचकित झाले आहेत. या घटनेने मनोरंजन आणि राजकारण या दोन्ही क्षेत्रात वाद निर्माण केला आहे. अनेकांनी संजय राऊत यांच्या शब्दांचे समर्थन केले, तर काहींनी महेश कोठारेंच्या वक्तव्यावर टीका केली.