Isabelle Kaif : कतरिनाची बहीण घेऊन येतेय अनोखी प्रेमकथा, धमाकेदार टीझर पाहिलात?

बॉलिवूडची सुपरस्टार कतरिना कैफची (Katrina Kaif ) बहिण लवकरच अभिनय क्षेत्रात पदार्पण करणार आहे. कतरिना कैफची बहीण इसाबेलचा (Isabelle Kaif) नवीन चित्रपट प्रेक्षकांच्या भेटीला येत आहे. या चित्रपटाचा धमाकेदार टीझर नुकताच रिलीज झाला आहे. इसाबेल आपल्या पहिल्या चित्रपटात बॉलिवूड अभिनेता पुलकित सम्राटसोबत (Pulkit Samrat) स्क्रीन शेअर करणार आहे. इसाबेलला मोठ्या पडद्यावर पाहण्यासाठी चाहते खूप उत्सुक आहेत.

इसाबेल ही 'सुस्वागतम खुशामदीद' या चित्रपटातून बॉलिवूडमध्ये पदार्पण करणार आहे. चित्रपटात इसाबेल ही आग्र्यातील नूर नावाच्या मुलीची भूमिका तर पुलकित दिल्लीमधील अमन नावाच्या मुलाची भूमिका साकारणार आहेत. चित्रपटात एक प्रेम कथा दाखवण्यात येणार आहे. टिझरमध्ये इसाबेल आणि पुलकितचा रोमँटिक अंदाज पाहायला मिळत आहे. दोघांची केमिस्ट्री पाहून चित्रपट पाहण्यासाठी प्रेक्षकांची उत्सुकता शिगेला पोहचली आहे.

'सुस्वागतम खुशामदीद' चित्रपटाच्या टिझरला हटके कॅप्शन देण्यात आले आहे. कॅप्शनमध्ये लिहिलं की, "दोन जीव, दोन संस्कृती, एक प्रेमकथा" सध्या या टिझरवर प्रेक्षकांकडून प्रेमाचा आणि कमेंट्सचा वर्षाव होत आहे. 'सुस्वागतम खुशामदीद' चित्रपट 16 मे ला प्रेक्षकांच्या भेटीला येणार आहे. चित्रपटात दोन वेगळ्या संस्कृती दाखवण्यात आल्या आहेत. ही प्रेम कथा अशी उलघडणार हे पाहणे मनोरंजक ठरणार आहे.

कतरिनाने आजवर अनेक हिट चित्रपट केले आहेत. आता इसाबेलही आपल्या अभिनयाची जादू प्रेक्षकांवर कशी करणार हे पाहणे मनोरंजक ठरणार आहे. 'सुस्वागतम खुशामदीद' चित्रपटात पुलकित सम्राट आणि इसाबेल कैफसोबतच साहिल वैद, प्रियांका सिंग, ऋतुराज सिंग, अरुण बाली, नीला मुल्हेरकर, मनु ऋषी चड्ढा, राजकुमार कनौजिया, श्रुती उल्फाद आणि सऊरोज हे कलाकार देखील पाहायला मिळणार आहेत.