मखमली सूर थांबले... ज्येष्ठ गायिकेचं निधन, संगीत क्षेत्रात शोककळा

दक्षिण भारतीय चित्रपटसृष्टीच्या सुवर्णकाळात आपल्या वैशिष्ट्यपूर्ण आवाजाने वेगळी ओळख निर्माण करणाऱ्या जेष्ठ पार्श्वगायिका जमुना राणी यांचे गुरुवारी 30 जुलै रोजी बेंगळूरमध्ये निधन झाले. त्या 88 वर्षांच्या होत्या. तीन दशकांहून अधिक काळाच्या कारकिर्दीत त्यांनी तमिळ, तेलुगू आणि सिंहला चित्रपटांसाठी हजारो गाणी गायली. त्यांच्या लोकसंगीतांच्या छटांनी भरलेल्या शैलीसाठी, भावपूर्ण गायकीसाठी आणि लयबद्ध सादरीकरण ही त्यांची विशेष ओळख होती.

1950 ते 1960 च्या दशकातील सर्वाधिक ओळखल्या जाणाऱ्या पार्श्वगायिकांपैकी एक असलेल्या जमुना राणी यांनी 1980 च्या दशकापर्यंत गायन सुरू ठेवले. आजच्या गायकांनी जरी सोशल मीडियाच्या माध्यमांवर प्रसिद्धी मिळवली असली तरी त्यांच्या गाण्यांचा प्रभाव पिढ्यान पिढ्या श्रोत्यांवर कायम राहिला. त्यांच्या सर्वाधिक गाजलेल्या तमिळ गाण्यांमध्ये ‘काळै वयासु कट्टाना मनसु’ (देइवपिरवी) हे गाणे विशेष उल्लेखनीय आहे. त्याच चित्रपटातील ‘सेन्तमिळ थेनमोजियाल’ या भावपूर्ण गाण्यालाही त्यांनी आवाज दिला होता, जरी टी.आर. महालिंगम यांच्या आवृत्तीला अधिक लोकप्रियता मिळाली. ‘पासामलार’ चित्रपटातील ‘पाट्टोन्द्रु केट्टेन, परवसम आनन’ हे गाणे त्याच्या खास कोरस आणि हमिंगमुळे आजही लक्षात राहते.

कॉमेडियन-गायक जे.पी. चंद्रबाबू यांच्यासोबतचे ‘कुंगुमापोवे कोंजुम पुरावे’ हे युगुलगीत आजही नव्या श्रोत्यांना आकर्षित करते. ‘मामा मामा मामा’ सारखी लोकसंगीताच्या धाटणीची गाणी आणि ‘अथिकै काई काई अलंकै वेन्निलावे’ यांसारख्या गाण्यांमध्येही त्यांचा सहभाग होता. पी.बी. श्रीनिवास यांच्यासोबतचे ‘आथिमनिथन काधलुक्कुपिन’ हे युगुलगीतही संगीतप्रेमींमध्ये आजही लोकप्रिय आहे.