Rakul Preet Singh: प्रसिद्ध बॉलिवूड अभिनेत्रीला झटका, आयकर विभागाकडून घरासह १२ ठिकाणी छापेमारी, नेमकं प्रकरण काय?

Rakul Preet Singh: बॉलिवूडशी संबंधित काही व्यक्ती आणि प्रॉडक्शन कंपन्यांच्या आर्थिक व्यवहारांबाबत आयकर विभागाकडून तपास सुरू असल्याची माहिती समोर आली आहे. अभिनेत्री रकुल प्रीत सिंग, ज्येष्ठ चित्रपट निर्माते वाशु भगनानी आणि पॅनोरामा स्टुडिओज यांच्याशी संबंधित ठिकाणी आयकर विभागाच्या पथकांकडून शोधमोहीम सुरू असल्याचा दावा करण्यात आला आहे. मात्र, या कारवाईबाबत अधिकृत तपशील किंवा संबंधितांकडून प्रतिक्रिया अद्याप समोर आलेली नाही.

मिळालेल्या माहितीनुसार,आयकर विभागाकडून अभिनेत्रीच्या घरासह मुंबईतील सुमारे १२ ठिकाणी तपास केला जात असल्याचे सांगितले जात आहे. चित्रपट निर्मिती, चित्रीकरण, परदेशातील वितरण आणि इतर मनोरंजनविषयक व्यवहारांशी संबंधित आर्थिक नोंदी तपासल्या जात असल्याची माहिती आहे.

परदेशातील व्यवहारांबाबत संशय?

आजतकच्या माहितीनुसार, चित्रपटांच्या निर्मिती आणि परदेशातील वितरणाच्या नावाखाली मोठ्या प्रमाणावर निधी परदेशात वळवण्यात आला आहे का, याची चौकशी केली जात असल्याचे सांगितले जात आहे. या व्यवहारांमध्ये टॅक्सशी संबंधित नियमांचे उल्लंघन किंवा आर्थिक अनियमितता झाली आहे का, याचा तपास आयकर विभाग करत असल्याचा दावा आहे.

रकुल प्रीत सिंग चर्चेत

या प्रकरणात अभिनेत्री रकुल प्रीत सिंगचे नाव समोर आले आहे. रकुलने हिंदी तसेच दाक्षिणात्य चित्रपटसृष्टीत काम केले आहे. सध्या ती रणबीर कपूरच्या ‘रामायण’ या चित्रपटातील महत्वपूर्ण भूमिकेमुळेही चर्चेत आहेत. या चित्रपटात ती शूर्पणखेची भूमिका साकारत आहे.

वाशु भगनानी आणि पॅनोरामा स्टुडिओज

अभिनेत्री रकुल प्रीत सिंगचे सासरे आणि निर्माते वाशु भगनानी हे पूजा एंटरटेनमेंटशी संबंधित असून त्यांनी अनेक हिंदी चित्रपटांची निर्मिती केली आहे. तर पॅनोरामा स्टुडिओज इंटरनॅशनल ही चित्रपट निर्मिती, वितरण आणि संबंधित मनोरंजन व्यवसायात कार्यरत कंपनी आहे.