Dhadkan: अंजली, राम आणि देवची केमेस्ट्री प्रेक्षकांच्या भेटीला; 'धडकन' होणार २५ वर्षांनंतर पुन्हा रिलीज

Dhadkan Movie Re-Release: बॉलिवूडच्या २००० साली प्रदर्शित झालेल्या 'धडकन' या रोमँटिक ड्रामाने प्रेक्षकांच्या मनात खास स्थान मिळवले होते. या चित्रपटाच्या २५ व्या वर्धापन दिनानिमित्त, 'धडकन' पुन्हा एकदा २३ मे २०२५ रोजी थिएटरमध्ये प्रदर्शित होत आहे. या निमित्ताने अभिनेता सुनील शेट्टीने आपल्या भावना व्यक्त केल्या आहेत.

सुनील शेट्टीने 'धडकन'च्या रि-रिलीजबद्दल बोलताना सांगितले की, "धडकन पुन्हा एकदा स्वतःला जिवंत करत आहे. माझ्या मते, लोकांना या कथानकामागील सौंदर्य समजेल एका मुलीवरील प्रेम, तिच्या पालकांच्या निवडीचा स्वीकार, आणि तिच्या पती रामसोबतचे जीवन." ते पुढे म्हणाले, "आजच्या काळात, नातेसंबंध लहानसहान गोष्टींमुळे तुटतात. पण 'धडकन' आपल्याला संयम, आदर आणि त्यागावर आधारित प्रेमकथा दाखवतो.

'धडकन' चित्रपटात शिल्पा शेट्टी, अक्षय कुमार आणि सुनील शेट्टी यांच्या प्रमुख भूमिका होत्या. धर्मेश दर्शन दिग्दर्शित या चित्रपटात अंजली, देव आणि राम यांच्यातील लव्ह ट्रेंगलचे भावनिक चित्रण करण्यात आले आहे. या चित्रपटातील संगीतही विशेष लोकप्रिय ठरले होते, ज्यात 'तुम दिल की धडकन में', 'दिल ने ये कहा है दिल से' आणि 'ना ना करते' यांसारख्या गाण्यांचा समावेश होता.

'धडकन'च्या पुनःप्रदर्शनाच्या दिवशीच सुनील शेट्टी यांचा नवीन चित्रपट 'केसरी वीर: लेजेंड्स ऑफ सोमनाथ' देखील प्रदर्शित होत आहे. या ऐतिहासिक चित्रपटात ते १४व्या शतकातील योद्ध्याची भूमिका साकारत आहेत. या दोन्ही चित्रपटांच्या निमित्ताने सुनील शेट्टी पुन्हा एकदा प्रेक्षकांच्या भेटीला येत आहेत.