तमिळनाडू (Tamilnadu) आणि आसपासच्या परिसराला 'मिचॉन्ग' चक्रीवादळाचा (cyclone michaung) मोठा फटका बसला आहे. या चक्रीवादळामुळे अनेक ठिकाणी पूर आला असून जनजीवन पूर्णत: विस्कळीत झाले आहे. या पूरामुळे मोठ्या प्रमाणात नुकसान झाले आहे. पूराचे पाणी शहरामध्ये शिरल्यामुळे अनेक परिसरातील घरं पाण्याखाली गेली आहेत. या पूराचा फटका साऊथ सुपरस्टार रजनीकांत (Rajinikanth) यांना देखील बसला आहे. रजनीकांत यांच्या घरामध्ये देखील पूराचे पाणी शिरलं आहे. याचा व्हिडीओ सध्या सोशल मीडिवर व्हायरल होत आहे.
मिचॉन्ग चक्रीवादळाचा चेन्नईला फटका बसला आहे. सुपरस्टार रजनीकांत याचे चेन्नईच्या पोएस गार्डन या पॉश एरियामध्ये घर आहे. मुसळधार पावसामुळे या परिसरातील रस्ते पाण्याखाली गेले आहेत. रजनिकांत यांच्या घरालाही पूराच्या पाण्याने वेढा घातला आहे. त्याच्या घराच्या परिसरात पूराचे पाणी शिरलं आहे. व्हिडीओमध्ये रजनीकांत यांच्या घराबाहेरील रस्त्यावर पाणीच पाणी दिसत आहे. त्याचसोबत त्यांच्या घरामध्ये देखील पाणी शिरल्याचे व्हिडीओमध्ये दिसत आहे. रजनीकांत यांच्या घराच्या परिसरातील व्हिडीओ सध्या सोशल मीडियावर व्हायरल होत आहे.
रजनीकांत पोएस गार्डन येथील घरी नव्हते आणि त्यांचे कुटुंबही दुसरीकडे स्थलांतरित झाले आहे. रजनीकांत यांच्या घरात पाणी शिरल्याचा व्हिडिओ एका चाहत्याने शूट केला आहे. जो पाहून प्रत्येकजण आश्चर्य व्यक्त करत आहे. 'थलायवा' सुद्धा या पूरस्थितीत अडकल्याने चाहत्यांना आश्चर्य वाटत आहे. रिपोर्ट्सनुसार, रजनीकांत सध्या चेन्नईबाहेर आहेत. ते सध्या तिरुनेलवेली असून या ठिकाणी 'थलाईवर 170' या त्यांच्या आगामी चित्रपटाचे शूटिंग सुरू आहे.
दरम्यान, तीन दिवसांपूर्वी आमिर खान आणि विष्णू विशाल हे देखील चेन्नईच्या पुरात अडकले होते. विष्णू विशालने सोशल मीडियावर काही फोटो शेअर केले होते. ज्यात तो आणि आमिर एनडीआरएफच्या बोटीत बसलेले दिसत होते. पूरामध्ये अडकलेल्या या दोघांना एनडीआरएफच्या टीमने रेस्क्यू केले होते. विष्णू विशालची पत्नी आणि बॅडमिंटनपटू ज्वाला गुट्टाही तिथेच होते. विष्णू विशालने फोटो शेअर करून एनडीआरएफच्या टीमचे आभार मानले होते.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.