Sonakshi Sinha: 'बडे मियाँ छोटे मियाँ' रिलीज होण्यापूर्वीच सोनाक्षी सिन्हाची लागली लॉटरी, पोस्ट करत दिली माहिती

Bade Miyan Chote Miyan:

बॉलिवूड (Bollywood) अभिनेत्री सोनाक्षी सिन्हा (Sonakshi Sinha) तिच्या बहुप्रतिक्षित चित्रपट 'बडे मियाँ छोटे मियाँ'मुळे (Bade Miyan Chote Miyan Movie) चर्चेत आहे. या चित्रपटाच्या माध्यमातून ती लवकरच प्रेक्षकांच्या भेटीला येणार आहे. हा चित्रपट रिलीज होण्यापूर्वीच सोनाक्षी सिन्हाची लॉटरी लागली आहे. सोनाक्षीच्या हाती आणखी एक चित्रपट लागला आहे. लवकरच ती विशाल राणाच्या चित्रपटात दिसणार आहे. या चित्रपटाचे टायटल अद्याप ठरलेले नाही. या चित्रपटाचे दिग्दर्शन करण रावल करणार आहे. विशाल राणा आणि सोनाक्षी सिन्हाने सोशल मीडियावर पोस्ट करत आगामी प्रोजेक्टबद्दल आनंद व्यक्त केला आहे.

एचेलॉन प्रॉडक्शनचे प्रमुख विशाल राणा अभिनेत्री सोनाक्षी सिन्हासोबत आपला आगामी रोमँटिक थ्रिलर चित्रपट तयार करणार आहेत. करण रावलने या चित्रपटाच्या दिग्दर्शनाची जबाबदारी घेतली आहे. या प्रोजेक्टबद्दल आपला उत्साह व्यक्त करताना विशाल राणाने सांगितले की, 'एका उत्कृष्ट टीमसोबत हा प्रवास सुरू करण्यासाठी मी खूप उत्सुक आहे. करण आणि सोनाक्षी सारख्या टॅलेंटसोबत काम करणं ही खूप आनंदाची गोष्ट आहे. आमची दृष्टी पडद्यावर आणण्यासाठी आम्ही प्रतीक्षा करू शकत नाही. ही एका अद्भुत साहसाची सुरुवात आहे. ते लवकरच सुरू होणार आहे.'

सोनाक्षी सिन्हाने आपल्या अधिकृत इन्स्टाग्रामवर विशाल राणा आणि करण रावलसोबतचा फोटो शेअर केला आहे. हा फोटो शेअर करत सोनाक्षीने कॅप्शनमध्ये लिहिले की, 'जेव्हा तीन व्यक्ती ज्यांना त्यांचे काम खूप आवडते, ते त्यामध्ये व्यस्त असतात. प्रेक्षकांना रोमांचित करण्यासाठी आम्ही एकत्र येण्याची वाट पाहत आहोत. तुम्हाला एक अशा ट्विस्टसोबत एक रोमँटिक थ्रिलर मिळेल. ज्याला तुम्ही विसरू शकणार नाही. निर्माते विशाल राणा आणि नवोदित दिग्दर्शक करण रावलसोबत अशा चित्रपटावर काम करताना आनंद होत आहे. लवकरच शूटिंगला सुरूवात होईल.'

नवीन प्रोजेक्टबद्दल सोनाक्षी सिन्हाने असे देखील सांगितले की, 'एचेलॉन प्रॉडक्शनसोबतचा हा माझा पहिला चित्रपट आहे. नवीन आणि रोमांचक भूमिका साकारण्यासाठी मी नेहमीच उत्सुक असते. हा चित्रपट माझा पुढचा प्रवास दर्शवेल. या चित्रपटात एक थरारक भूमिका साकारण्यासाठी मी खूप आनंदी आणि खूप उत्सुक आहे.'

या चित्रपटाचे शूटिंग लवकरच सुरू होणार आहे. चित्रपटासंबंधीची उर्वरित माहितीही लवकरच शेअर केली जाईल. 'बडे मियाँ छोटे मियाँ' या चित्रपटाबद्दल बोलायचे झाले तर, हा चित्रपट एप्रिलमध्ये प्रदर्शित होणार आहे. यामध्ये सोनाक्षी सिन्हासोबत अक्षय कुमार आणि टायगर श्रॉफ मुख्य भूमिकेत दिसणार आहेत. दोघेही आपल्या ॲक्शनचा पराक्रम दाखवताना दिसणार आहेत. हा चित्रपट अली अब्बास जफरने दिग्दर्शित केला आहे.