Bigg Boss 20: बिग बॉसच्या घरातून पहिला स्पर्धक बाहेर; रोहेद खानच्या चाहत्यांना धक्का

सध्या ‘बिग बॉस 20’ ची प्रेक्षकांमध्ये जोरदार चर्चा सुरू आहे. सलमान खान हा शो होस्ट करत आहे. ६ सप्टेंबरपासून जिओ हॉटस्टारवर सुरू झालेल्या या सीझनमध्ये टीव्ही, संगीत, क्रीडा, सोशल मिडिया आणि रॅपींग क्षेत्रातल्या १६ स्पर्धकांनी घरात प्रवेश केला आहे. शो सुरू झाल्यानंतर काही दिवसातच घरातलं पहिलं एलिमिनेशन झालं असून, रोहेद खान (Rohed Khan) याला घराबाहेर रस्सा दाखवण्यात आल्याची माहिती समोर आली आहे.

रोहेद खान शोमध्ये फारसा सक्रिय दिसत नव्हता. टास्क असो किंवा घरातले दैनंदिन काम, त्याचा सहभाग तुलनेने कमी असल्याचं पाहायला मिळालं. याच मुद्द्यावरून वीकेंड का वारमध्ये सलमान खानने रोहेदला सुनावलं होतं. शोमध्ये त्याचा गेम ठळकपणे दिसत नसल्याचं सलमानने त्याला सांगितलं होतं.

दरम्यान, काही टास्कमध्ये कमी सहभाग आणि शोमध्ये सक्रिय न दिसल्यामुळे रोहेदला इतर स्पर्धकांकडूनही टीकेचा सामना करावा लागला. शिक्षा म्हणून आसिफ खान, तन्मय सिंह उर्फ ScoutOP आणि रोहेद खान यांना थेट नॉमिनेट करण्यात आलं होतं. अखेर या तिघांपैकी रोहेद खानला घराबाहेर जावं लागलं.

घरातील ‘फेक सदस्य’ कोण?

बिग बॉसने घरातील सदस्यांसाठी एक मजेदार क्विझही घेतली. यामध्ये घरातला सर्वात ‘फेक’ सदस्य कोण, ‘क्राय बेबी’ म्हणजेच सतत रडणारा सदस्य कोण आणि ‘बुली गँग’मध्ये कोणाचा समावेश होतो, असे प्रश्न विचारण्यात आले. ‘फेक सदस्य’ म्हणून अमन गांधीचं नाव घेण्यात आलं, तर ‘क्राय बेबी’ म्हणून अरिश्फा खानचं नाव समोर आलं. मात्र ‘बुली गँग’मध्ये कोणाचं नाव येतं, हे पुढील एपिसोडमध्ये स्पष्ट होणार आहे.

या सीझनमध्ये मेरी कोम, माही विज, कनिका मान, आम्रपाली दुबे, ईशा रिखी, खुशी दुबे, अरिश्फा खान, कुशल तंवर उर्फ गुल्लू, तन्मय सिंह उर्फ ScoutOP, रॅपर यंग DSA, आसिफ खान, फैजल खान, काजी तौकीर, अमन गांधी, उदिती सिंह आणि रीती तिवारी हे १६ स्पर्धक सहभागी झाले आहेत. दरम्यान, गुल्लू हा घराचा दुसरा कॅप्टन बनला आहे.