Sunny Leone: २४०० कोटी रुपयांचा घोटाळा; सनी लिओनीला CIDची नोटीस

Sunny Leone: कर्नाटकातील तब्बल 2400 कोटींच्या गुंतवणूक घोटाळ्याच्या तपासादरम्यान अभिनेत्री सनी लिओनचे नाव समोर आल्याने मोठी चर्चा रंगली आहे. कर्नाटक गुन्हे अन्वेषण विभागाने (CID) सनी लिओनला नोटीस बजावून काही आर्थिक व्यवहारांबाबत माहिती मागवली आहे. मात्र, या प्रकरणात सनी लिओन आरोपी नसून तिच्याकडून केवळ चौकशीसाठी माहिती घेतली जाणार असल्याचे अधिकाऱ्यांनी स्पष्ट केले आहे.

हा संपूर्ण घोटाळा ‘शिवम असोसिएट्स’ या संस्थेशी संबंधित असून, मुख्य आरोपी शिवानंद नीलण्णावर याने हजारो गुंतवणूकदारांकडून मोठ्या परताव्याचे आमिष दाखवत कोट्यवधी रुपये जमा केल्याचा आरोप आहे. तपास यंत्रणांच्या माहितीनुसार, सुमारे 40 हजारांहून अधिक गुंतवणूकदारांकडून 2400 कोटींचा निधी जमा करण्यात आला होता.

तपासादरम्यान काही गुंतवणूकदारांचा पैसा चित्रपटसृष्टीत वळवण्यात आल्याचा संशय CIDला आहे. याच पार्श्वभूमीवर सनी लिओनची चौकशी केली जाणार आहे. अहवालानुसार, 2023 मध्ये प्रदर्शित झालेल्या कन्नड चित्रपट चॅम्पियन मधील एका विशेष गाण्यासाठी सनी लिओनला सुमारे 1 कोटी मानधन देण्यात आले होते. हा चित्रपट मुख्य आरोपी शिवानंद नीलण्णावर याने निर्मित केला होता. त्यामुळे ते पैसे कुठून आले हे समजून घेण्यासाठी CIDने तिच्याकडून माहिती मागितली आहे.

CID अधिकाऱ्यांनी स्पष्ट केले आहे की, सनी लिओनने कोणताही गैरप्रकार केल्याचा पुरावा सध्या समोर आलेला नाही. तिच्याकडे पाठवलेली नोटीस ही केवळ आर्थिक व्यवहारांची पडताळणी करण्यासाठी आणि पैशांचा प्रवाह समजून घेण्यासाठी आहे. दरम्यान, या घोटाळ्याप्रकरणी मुख्य आरोपी शिवानंद नीलण्णावर याला अटक करण्यात आली असून त्याची 30 हून अधिक बँक खाती गोठवण्यात आली आहेत.