Ranveer Singh Receives Threat: रोहित शेट्टीनंतर रणवीर सिंगला मिळाली जीवे मारण्याची धमकी; बॉलिवूडमध्ये भीतीचं वातावरण

संजय गडदे, साम टिव्ही

Ranveer Singh Receives Threat: बॉलिवूड अभिनेता रणवीर सिंग याला व्हॉट्सअ‍ॅपवरून व्हॉइस नोट पाठवून जीवे मारण्याची धमकी देत कोट्यवधी रुपयांची खंडणी मागितल्याचा धक्कादायक प्रकार समोर आला आहे. अज्ञात व्यक्तीने पाठवलेल्या या धमकीच्या संदेशामुळे चित्रपटसृष्टीत खळबळ उडाली असून पोलिसांनी तातडीने दखल घेतली आहे.

मिळालेल्या माहितीनुसार, धमकी देणाऱ्या व्यक्तीने रणवीर सिंगकडे कोट्यवधींच्या रकमेची मागणी केली असून पैसे न दिल्यास गंभीर परिणाम भोगावे लागतील, असा इशारा दिला आहे. या प्रकरणी तक्रार दाखल होताच मुंबई पोलिसांनी तपास सुरू केला असून सायबर सेलच्या मदतीने धमकी देणाऱ्या व्यक्तीचा शोध घेतला जात आहे.

दरम्यान, कोणतीही अनुचित घटना घडू नये यासाठी रणवीर सिंगच्या घराबाहेर आणि त्याच्या हालचालींवर अतिरिक्त सुरक्षा तैनात करण्यात आली आहे. पोलिसांकडून संपूर्ण प्रकरणाची गंभीरतेने चौकशी सुरू असून लवकरच आरोपीला अटक करण्यात येईल, असा विश्वास व्यक्त केला जात आहे.

रणवीर सिंगने नुकताच प्रदर्शित झालेला धुरंधर हा चित्रपट सुपरहिट ठरला आहे. आता लवकरच या चित्रपटाचा दुसरा भाग प्रदर्शित होणार आहे. रणवीर सिंगपूर्वी दिग्दर्शक रोहित शेट्टीच्या घरावर गोळीबाराची धक्कादायक घटना घडली होती. या घटनेमुळे सेलिब्रिटींच्या सुरक्षेचा प्रश्न पुन्हा एकदा ऐरणीवर आला असून चाहत्यांमध्येही रणवीर सिंगच्या सुरक्षिततेबाबत चिंता व्यक्त केली जात आहे.