Shindawane Ghat Accident News : शिंदवणे घाटात माल वाहतुकीच्या वाहनास अपघात, युवकाचा जागेवरच मृत्यू; तिघे जखमी

- सागर आव्हाड

Pune :

उरुळी कांचन - जेजुरी मार्गावरील शिंदवणे घाटात माल वाहू वाहनाचा साेमवारी (ता. 8) मध्यरात्री अपघात झाला. या अपघातात एका युवकाचा मृत्यू झाला असून तिघेजण गंभीर जखमी झाले आहेत. या अपघातामधील जखमींना उरुळी कांचन मधील एका रुग्णालयात उपचारार्थ दाखल करण्यात आले आहे. उरुळी कांचन पोलिस अपघाताचा तपास करीत आहेत. (Maharashtra News)

उरुळी कांचन पोलिसांच्या माहितीनुसार झुब्बर पासवान व त्यांची दोन मुले, एक कामगार व वाहन चालक हे भंगार मालाचे साहित्य घेऊन सासवड भागातून उरुळी कांचनकडे रात्री अकरा वाजण्याच्या सुमारास निघाले होते. साडेबारा वाजण्याच्या सुमारास शिंदवणे घाटात आले असता चालक गौतम मेमाणे यांना वळणावरील रस्त्याचा अंदाज आला नाही. त्यांचा वाहनावरील ताबा सुटल्याने अपघात झाला.

या अपघातात पुजन पासवान याच्या डोक्याला, हाताला मोठ्या प्रमाणात जखमा झाल्याने त्याचा जागीच मृत्यू झाला. या अपघातात उमेष पासवान, झुब्बर पासवान, दिलीप कुमार व चालक गौतम मेमाणे जखमी झाले आहेत. या अपघातातील उमेष पासवान हा गंभीर जखमी झाला असून त्याच्यावर उरुळी कांचन येथील खाजगी रुग्णालयात उपचार सुरु आहेत अशी माहिती पाेलिसांनी दिली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar