वर्धा हादरलं! मदतीच्या बहाण्याने फसवलं; रेल्वे स्थानकावर तरुणीवर सामूहिक अत्याचार

चेतन व्यास, साम प्रतिनिधी

वर्धा रेल्वे स्थानकावर बाहेरगावाहून आलेल्या एका युवतीवर सामूहिक अत्याचार झाल्याचा धक्कादायक प्रकार समोर आला आहे. २३ सप्टेंबरच्या सायंकाळी युवती वर्धा रेल्वे स्थानकावर आली होती. यावेळी काही संशयित युवकांनी मदतीच्या बहाण्याने तिला रेल्वे स्टेशन परिसरातून बाहेर नेले.

त्यानंतर शहरातील दोन वेगवेगळ्या ठिकाणी तिच्यावर अत्याचार केलाय. एका युवकाने पोलिसांना माहिती दिल्यानंतर लोहमार्ग पोलिसांनी तपासाला सुरुवात केली. परिसरातील सीसीटीव्ही फुटेज तपासण्यात येत असून संशयित युवकांना पोलिसांनी ताब्यात घेतले आहे. लोहमार्ग पोलीस अधीक्षक मंगेश शिंदे स्वतः वर्ध्यात दाखल झाले असून पीडिता आणि संशयितांची चौकशी सुरू आहे. दरम्यान, पीडिता आदिवासी समाजातील असल्याने विविध संघटनांच्या पदाधिकाऱ्यांनी लोहमार्ग पोलीस ठाण्यात धाव घेत आरोपींवर कठोर कारवाईची मागणी केली आहे.

पीडितेने दिलेल्या माहितीनुसार ही घटना २४ तारखेच्या मध्यरात्री २ ते ३ वाजण्याच्या सुमारास घडली. तिच्या दाव्यानुसार एकूण ५ ते ६ जणांनी सामूहिक अत्याचार केला. पीडित तरुणी ही चंद्रपूर येथे तिच्या नातेवाईकांकडे गेली होती. तेथून परतताना ती आधी सेवाग्राम आणि त्यानंतर वर्धा स्थानकावर पोहोचली. मात्र ती वर्ध्यात पोहोचली तोपर्यंत खूप उशीर झाला होता.

तरुणी स्थानकावर असताना एका ऑटो चालकाने तिला बस डेपोमध्ये सोडण्याच्या बहाण्याने स्टेशनच्या बाहेर नेले. त्यानंतर तिथे उपस्थित असलेल्या दोन जणांनी तिच्यावर अत्याचार केला. या घटनेनंतर पीडित तरुणी कसाबसा धीर धरत पुन्हा स्थानकावर पोहोचली. मात्र, काही वेळातच काही जण पुन्हा आले. तिला जबरदस्तीने परत घेऊन गेले. यावेळी पहिल्यांदा अत्याचार करणारे आरोपीही त्यांच्यासोबत होते.