Crime News: संतापजनक! बेशुद्ध करत महिलेवर बलात्कार; उपचाराच्या बहाण्याने दिलं भूलचं इंजेक्शन,नंतर...

एका खासगी रुग्णालयात उपचारासाठी आलेल्या महिलेला बेशुद्ध करत तिच्यावर अत्याचार केल्याची घटना घडलीय. ही घटना युपीतील बलरामपुरात घडलीय. या घटनेनंतर संताप व्यक्त केला जात आहे. दरम्यान पोलिसांनी रुग्णालयातील आरोग्य कर्मचाऱ्याला अटक केलीय. पीडितेच्या तक्रारीवरून त्याच्याविरुद्ध बलात्कारासह अनेक गंभीर कलमांखाली गुन्हा दाखल करण्यात आलाय.

या घटनेप्रकरणी पोलिस अधीक्षक विकास कुमार यांनी माहिती दिलीय. ही घटना २५ जुलै रोजी बलरामपूरच्या पाचपेडवा पोलीस स्टेशन परिसरातील विमला विक्रम रुग्णालयात घडली. गैसडी परिसरातील एक २८ वर्षीय महिला काही आजाराच्या उपचारासाठी रुग्णालयात आली होती. त्यावेळी तेथील आरोग्य कर्मचाऱ्याने उपचाराच्या बहाण्याने तिला बेशुद्ध केलं. त्यासाठी महिलेला भूलचं इंजेक्शन दिले. महिला बेशुद्ध पडताच त्याने तिच्यावर बलात्कार केला. योगेश पांडे असं आरोग्य कर्मचाऱ्याचं नाव आहे.

दरम्यान महिलेला शुद्ध आल्यानंतर तिने मोठ्या हिमतीने पोलिसांमध्ये तक्रार दिली. आपल्या सोबत घडलेल्या अत्याचाराची माहिती दिली. पीडित महिलेच्या तक्रारीच्या आधारे, पोलिसांनी भारतीय दंड संहितेच्या संबंधित कलमांखाली गुन्हा दाखल केला आणि आरोपीला अटक केली. आरोपीची चौकशी सुरू असून त्याला लवकरच न्यायालयात हजर केले जाणार आहे. पोलीस त्याची रिमांड मागणार आहेत.

दरम्यान या घटनेनंतर रुग्णालय व्यवस्थापनाच्या भूमिकेवर गंभीर प्रश्न उपस्थित होत आहेत. आरोपीला रुग्णांना इंजेक्शन देण्याची परवानगी कोणत्या आधारावर देण्यात आली याचाही तपास पोलिस करत आहेत.रुग्णालय प्रशासनाने कधी त्याच्या वागण्यावर आणि काम करण्याच्या पद्धतीवर लक्ष दिले नाही का? या संपूर्ण प्रकरणाची व विविध बाजूने चौकशी केली जात आहे. सध्या आरोपीची पोलीस कोठडीत चौकशी सुरू आहे.

रुग्णवाहिकेत तरुणीवर अत्याचार

काही दिवसापूर्वी एका तरुणीवर रुग्णवाहिकेत अत्याचार झाल्याची घटना बिहारमध्ये घडली होती. पीडिता होमगार्डच्या परीक्षेसाठी गेली होती. शारीरिक चाचणीच्या वेळी तरुणी चक्कर येऊन खाली पडली होती. त्यावेळी तिला रुग्णवाहिकेतून रुग्णालयात नेत असताना तिच्यावर अत्याचार झाला होता.